ໂຄງການກໍ່ສ້າງຂົວຂ້າມດອນໂຂງ (ບ້ານຫາດ-ບ້ານຫ້ວຍ) ແຂວງຈຳປາສັກ ເຊິ່ງມາຮອດປັດຈຸບັນ ສຳເລັດເກືອບ 100%
ພາຍຫຼັງເລີ່ມດຳເນີນການກໍ່ສ້າງມາແຕ່ປີ 2012 ແລະ ຈະເປີດນຳໃຊ້ຢ່າງເປັນທາງການ ໃນທ້າຍເດືອນພະຈິກ ປີ 2014 ທີ່
ຈະມາເຖິງນີ້.
ທ່ານ ຄຳຮຸ່ງ ໜູພະໄຊ ຫົວໜ້າໂຄງການກໍ່ສ້າງຂົວຂ້າມດອນໂຂງ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 26 ເດືອນຕຸລາ ປີ
2014 ນີ້ວ່າ: ໂຄງການກໍ່ສ້າງຂົວຂ້າມນ້ຳຂອງດອນໂຂງ ແຂວງຈຳປາສັກ ແມ່ນໂຄງການບູລິມະສິດຂອງລັດຖະບານ ເຊິ່ງ
ນອນໃນແຜນພັດທະນາເສດຖະກິດ-ສັງຄົມ ໃນທົ່ວປະເທດ ເວົ້າລວມ ເວົ້າສະເພາະ ກໍ່ຄືຕາໜ່າງຄົມມະນາຄົມເຂົ້າເຖິງ
ດອນໂຂງ ຂົວຂ້າມດອນໂຂງນີ້ ມີແມ່ນຈະແຕກຕ່າງຈາກຂົວແຫ່ງອື່ນໆ ເນື່ອງຈາກວ່າມີລັກສະນະໂຄ້ງ ກົ່ງກາງ ຮັບນ້ຳ
ໜັກໄດ້ 100 ໂຕນ ຍາວ 718 ແມັດ ກວ້າງ 11 ແມັດ ທາງຄົນຍ່າງ 2 ຂ້າງ-ຂ້າງລະ 1,5 ແມັດ ໜ້າທາງລົດກວ້າງ 8 ແມັດ
ແລະ ມີອາຍຸການນຳໃຊ້ 100 ປີ.
ນອກຈາກສ້າງຂົວດັ່ງກ່າວແລ້ວ ຍັງໄດ້ສ້າງຂົວນ້ອຍ (ບ້ານຫົວໂຂງແຫຼມ-ບ້ານດອນສັນ) ຍາວ 180 ແມັດ ກວ້າງ 5 ແມັດ
ສ້ອມແປງ ແລະ ຂະຫຍາຍທາງຈາກທາງແຍກ 13 ໃຕ້ເຂົ້າຫາຂົວ ມີຄວາມຍາວ 4.200 ແມັດ ກວ້າງ 7 ແມັດ ປູຢາງ 2 ຊັ້ນ
ແລະ ກໍ່ສ້າງທ່າບັກ ບ້ານຫົວໂຂງໃຫຍ່ (ເມືອງໂຂງ) ຫາບ້ານຫ້ວຍຍາງ (ເມືອງມຸນລະປະໂມກ) ຕື່ມອີກ ລວມມູນຄ່າການກໍ່
ສ້າງທັງໝົດ 34 ລ້ານກວ່າໂດລາສະຫະລັດ ຫຼື ເທົ່າກັບ 272 ຕື້ກວ່າກີບ ໃນນັ້ນ ແຫຼ່ງທຶນແມ່ນກູ້ຢືມຈາກທະນາຄານຂາ
ອອກ-ຂາເຂົ້າ (EXIM BANK) ສປ ຈີນ ແລະ ທຶນສົມທົບຈາກລັດຖະບານລາວ 5% ໂດຍແມ່ນບໍລິສັດ HNDCI ສປ ຈີນ
ເປັນຜູ້ຮັບເໝົາກໍ່ສ້າງ.
ແຫລ່ງຂ່າວ: ວຽງຈັນໃໝ່