ອົງການຕໍ່ຕ້ານສານກະຕຸ້ນໂລກ (WADA) ໄດ້ຖະແຫຼງຂ່າວໃນທ້າຍອາທິດຜ່ານມາວ່າ ປະເທດໄທບໍ່ປະຕິບັດຕາມບົດບັນຍັດວ່າດ້ວຍສານກະຕຸ້ນຂອງ WADA, ຂະນະທີ່ ອິນໂດເນເຊຍ ແລະເກົາຫຼີເໜືອໄດ້ແຫກກົດຂອງອົງການສານກະຕຸ້ນໂລກ ໂດຍບໍ່ສົ່ງນັກກິລາຂອງຕົນເຂົ້າກວດສານກະຕຸ້ນ ເຊິ່ງທັງສາມປະເທດມີໂອກາດຖືກລົງໂທດໜັກພໍສົມຄວນ.

ທັງສາມປະເທດດັ່ງກ່າວຈະຖືກ WADA ຕັດສິນລົງໂທດ ດ້ວຍການຫ້າມເປັນເຈົ້າພາບຈັດງານແຂ່ງຂັນກິລາລະດັບຊາດ, ທະວີບ ແລະລະດັບໂລກໃນທຸກລາຍການ ພ້ອມກັນນັ້ນ ຄະນະກຳມະການກິລາຂອງສາມປະເທດກໍຍັງຖືກປົດຕຳແໜ່ງອອກຈາກຄະນະກຳມະການຂອງ WADA ຊົ່ວຄາວຢ່າງໜ້ອຍ 1 ປີ ຫຼື ຈົນກວ່າຈະມີຄຳສັ່ງຄືນຕຳແໜ່ງ.

ຢ່າງໃດກໍຕາມ, ນັກກິລາທັງສາມປະເທດຍັງສາມາດເຂົ້າແຂ່ງຂັນລະດັບໂລກໄດ້ ໂດຍຈະບໍ່ສາມາດນຳໃຊ້ທຸງຊາດໃນນາມຕົວແທນຂອງປະເທດຫາກລາຍການແຂ່ງຂັນນັ້ນມີ WADA ແລະ ຄະນະກຳມະການໂອລິມປິກສາກົນ (IOC) ເປັນຜູ້ດູແລການແຂ່ງຂັນ ແຕ່ຈະສາມາດນຳໃຊ້ທຸງຊາດຂອງຕົນເອງໃນການແຂ່ງຂັນຊີເກມ 2022 ທີ່ປະເທດຫວຽດນາມ ເນື່ອງຈາກຝ່າຍຈັດການແຂ່ງຂັນຊີເກມຄັ້ງນີ້ບໍ່ໄດ້ຢູ່ໃນລະບົບຂອງ WADA.

ຂໍ້ມູນຈາກ: ເວັບໄຊໄທຣັດ