ສໍານັກຂ່າວ khaosad ລາຍງານວ່າ ວັນທີ 7 ຕຸລາ 2021 ອົງການອະນາໄມໂລກ (WHO) ຖະແຫຼງວ່າ ໄດ້ສົ່ງການຊ່ວຍເຫຼືອເພື່ອປ້ອງກັນການແຜ່ລະບາດຂອງພະຍາດໂຄວິດ-19 ໃຫ້ແກ່ ເກົາຫຼີເໜືອ ໂດຍຂົນສົ່ງໂດຍທ່ເຮືອເມືອງຕ້າຫຼຽນ ຫຼຽວໜິງ ຢູ່ທາງຕາເວັນອອກສ່ຽງເໜືອຂອງຈີນ ເນື່ອງຈາກເກົາຫຼີເໜືອຍັງປິດດ່ານທາງບົກລະຫວ່າງປະເທດ.
ຄວາມເຄື່ອນໄຫວດັ່ງກ່າວເກີດຂຶ້ນປະມານ 1 ເດືອນຫຼັງຈາກທາງການເກົາຫຼີເໜືອປະຕິເສດຮັບການຊ່ວຍເຫຼືອຈາກອົງການອະນາໄມໂລກ ແລະ ຂໍໃຫ້ນໍາວັກຊີນປ້ອງກັນພະຍາດໂຄວິດ-19 ຂອງບໍລິສັດ Sinovac ປະເທດຈີນ ປະມານ 3 ລ້ານໂດສ ເຊິ່ງເປັນສ່ວນໜຶ່ງຂອງໂຄງການ COVAC ໄປບໍລິຈາກໃຫ້ປະເທດອື່ນທີ່ປະສົບວິກິດເພາະວ່າເກົາຫຼີເໜືອບໍ່ກວດພົບຜູ້ຕິດເຊື້ອ.
ອົງການອະນາໄມໂລກໄດ້ຖະແຫຼງການວ່າ “ເພື່ອສະໜັບສະໜຸນສາທາລະນະລັດ ປະຊາທິປະໄຕປະຊາຊົນເກົາຫຼີເໜືອ ດ້ວຍເຄື່ອງມືທາງການແພດສໍາລັບໃຊ້ປ້ອງກັນພະຍາດໂຄວິດ-19 ອົງການອະນາໄມໂລກ ໄດ້ເລີ່ມຈັດສົ່ງຄວາມຊ່ວຍເຫຼືອນີ້ຈາດທ່າເຮືອຕ້າຫຼຽນ ປະເທດຈີນ”. ຢ່າງໃດກໍຕາມ, ອົງການອະນາໄມໂລກກໍຍັງບໍ່ໄດ້ແຈ້ງຊັດເຈນເທື່ອວ່າ ສິ່ງຂອງຊ່ວຍເຫຼືອນັ້ນໄດ້ເຂົ້າເຖິງເກົາຫຼີເໜືອ ຫຼື ບໍ່.
ຂະນະທີ່ລາຍງານການກວດຫາເຊື້ອໃນເກົາຫຼີເໜືອ ລ່າສຸດ ວັນທີ 23 ກັນຍາ 2021 ລະບຸວ່າ ເຈົ້າໜ້າທີ່ໄດ້ກວດຫາໂຄວິດ-19 ໃນປະຊາຊົນກຸ່ມສ່ຽງຢ່າງໜ້ອຍ 40,700 ຄົນ ແຕ່ຜົນກວດເປັນລົບທັງໝົດ.