ສຳນັກຂ່າວ Reuters ລາຍງານ: ບັນດາປະເທດໃນອາຊີຕາເວັນອອກສ່ຽງໃຕ້ກຳລັງປຶກສາກັນກ່ຽວກັບການທີ່ຈະບໍ່ເຊີນຜູ້ນຳຜະເດັດການທະຫານມຽນມາເຂົ້າຮ່ວມກອງປະຊຸມສຸດຍອດອາຊຽນທີ່ຈະຈັດຂຶ້ນໃນທ້າຍເດືອນນີ້ ເນື່ອງຈາກຂາດການລາຍງານຄວາມຄືບໜ້າກ່ຽວກັບແຜນງານກ່ຽວກັບການຟື້ນຟູສັນຕິພາບພາຍໃນມຽນມາຕາມທີ່ເຄີຍຕົກລົງກັນກ່ອນໜ້ານີ້.

ທ່ານ ເອຣີວານ ຢູຊອຟ, ທູດພິເສດຂອງກຸ່ມປະຊາຊາດປະຈຳມຽນມາກ່າວວ່າ: ການປະຕິບັດແຜນງານຫ້າປະການຕາມທີ່ໄດ້ຕົກລົງກັນລະຫວ່າງລັດຖະບານທະຫານມຽນມາກັບສະມາຄົມອາຊຽນ ໃນເດືອນເມສາຜ່ານມານັ້ນ ມາຮອດປັດຈຸບັນກໍຍັງບໍ່ມີຄວາມຄືບໜ້າໃດໆ ຍ້ອນແນວນັ້ນເອງຈິ່ງເປັນຜົນໃຫ້ຫຼາຍປະເທດໃນອາຊຽນ ຫາລືກັນອີກຄັ້ງກ່ຽວກັບການທີ່ຈະບໍ່ເຊີນລັດຖະບານຂອງມຽນມາເຂົ້າຮ່ວມກອງປະຊຸມສຸດຍອດທີ່ຈະຈັດຂຶ້ນໃນລະຫວ່າງວັນທີ 26-28 ຕຸລາ.

ມຽນມາຕົກຢູ່ໃນຄວາມສັບສົນວຸ້ນວາຍນັບແຕ່ເກີດລັດຖະປະຫານໃນວັນທີ 1 ກຸມພາຜ່ານມາ ນຳໂດຍ ມິນ ອອງລາຍ, ຜູ້ບັນຊາການທະຫານສູງສຸດທີ່ໄດ້ຢຸດຕິລະບອບປະຊາທິປະໄຕເປັນເວລາກວ່າທົດສະວັດ ແລະການກັບມາປົກຄອງປະເທດຂອງກຸ່ມທະຫານຄັ້ງນີ້ ເຮັດໃຫ້ເກີດຄວາມບໍ່ພໍໃຈທັງພາຍໃນ ແລະຕ່າງປະເທດ.