ເກີດເຫດເຮືອບິນນ້ອຍຕົກໃສ່ອາຄານຮ້າງຢູ່ທີ່ເມືອງມິລານ ຂອງອິດຕາລີ ເຮັດໃຫ້ຜູ້ໂດຍສານ 8 ຄົນເທິງເຮືອບິນເສຍຊີວິດທັງໝົດ ລວມທັງຄອບຄົວຂອງມະຫາເສດຖີຊາວໂຣມັນເນຍ.
ສໍານັກຂ່າວ BBC ລາຍງານວ່າ ເຮືອບິນສ່ວນໂຕ ທີ່ມີຊື່ລຸ້ນວ່າ Pilatus PC-12 ໄດ້ເດີນທາງອອກຈາກສະໜາມບິນ ລິນາເຕ ໃນເມືອງມິລານ ເມື່ອວັນທີ 3 ຕຸລາ 2021 ເພື່ອເດີນທາງໄຍັງເກາະ ຊາດິເນຍ ແຕ່ເຮືອບິນລໍາດັ່ງກ່າວກໍໄດ້ເກີດອຸບັດຕິເຫດຕົກລງມາ ຫຼັງຂຶ້ນບິນໄດ້ເວລາບໍ່ດົນ ໂດຍຜູ້ທີ່ເຫັນເຫດການບອກວ່າ ໄດ້ຍິນສຽງລະເບີດໃນຂະນະທີ່ເຮືອບິນຕົກໃສ່ຕຶກສູງ 2 ຊັ້ນ ຈົນເກີດເຫດໄຟໄໝ້ເກີດຂຶ້ນ.
ສື່ທ້ອງຖິ່ນຂອງອິດຕາລີລະບຸວ່າ ເຮືອບິນລໍານີ້ ມີໜຶ່ງໃນບຸກຄົນທີ່ລວຍທີ່ສຸດໃນໂຣມັນເນຍ ອາຍຸ 68 ປີ ຊື່ວ່າ ແດນ ເປເຕຣສຄູ ເຊິ່ງເປັນຄົນຂັບ ລາວເສຍຊີວິດໄປພ້ອມກັບເມຍ ແລະ ລູກຊາຍທີ່ມີອາຍຸ 30 ປີ ລວມທັງຄົນອື່ນໆ ລວມເປັນ 8 ສົບ.
ທາງດ້ານຕຶກທີ່ຖືກເຮືອບິນຕົກໃສ່ນັ້ນ ເປັນຕຶກທີ່ວ່າງ ເນື່ອງຈາກກໍາລັງຢູ່ລະຫວ່າງການກໍ່ສ້າງ ແຕ່ກໍມີລົດໃຫຍ່ທີ່ຈອດຢູ່ບໍລິເວນແຖວນັ້ນເສຍຫາຍຫຼາຍຄັນ. ຈົນເຖິງປັດຈຸບັນ ກໍຍັງບໍ່ມີການເປີດເຜີຍກ່ຽວກັບສາເຫດທີ່ເຮັດໃຫ້ເຮືອບິນລໍານີ້ຕົກລົງມາ.