ໃນວັນທີ 30 ກັນຍາ 2021 ສໍານັກຂ່າວຈາກເມືອງກວາງໂຈ ປະເທດຈີນໄດ້ລາຍງານວ່າ: ເຖິງແມ່ນວ່າບັນດາປະເທດຕ່າງໆໄດ້ເລີ່ມມີການປັບຮູບແບບການຄວບຄຸມພະຍາດ ແລະ ມາດຕະການທາງສັງຄົມໃນການຢູ່ຮ່ວມກັບພະຍາດໂຄວິດ-19 ແຕ່ທາງລັດຖະບານຂອງປັກກິ່ງຍັງຄົງຍຶດໝັ້ນກັບຍຸດທະສາດທີ່ວ່າ ”ໂຄວິດຕ້ອງເປັນສູນ” ເທົ່ານັ້ນ.
ລັດຖະບານຈີນກໍາລັງເລັ່ງດໍາເນີນການກໍ່ສ້າງ “ສະຖານີສຸຂະພາບນານາຊາດກວາງໂຈ” ທີ່ຕັ້ງຢູ່ເມືອງກວາງໂຈ ໂດຍໂຄງການດັ່ງກ່າວໃຊ້ເວລາໃນການກໍ່ສ້າງບໍ່ເກີນ 3 ເດືອນ ແລະ ກໍາລັງຈະກໍ່ສ້າງແລ້ວພາຍໃນອີກບໍ່ດົນນີ້. ໂຄງການນີ້ປະກອບດ້ວຍອາຄານຂະໜາດໃຫຍ່ທີ່ມີຄວາມສູງ 3 ຊັ້ນ ເປັນຈໍານວນຫຼາຍກວ່າ 10 ອາຄານ ແລະ ມີຫ້ອງນອນລວມທັງໝົດ 5.000 ຫ້ອງ.
ໂຄງການດັ່ງກ່າວໃຊ້ງົບປະມານ 260 ລ້ານດອລລ້າ ເຊິ່ງຈະໃຊ້ເປັນສະຖານທີ່ກັກໂຕຜູ້ທີ່ເດີນທາງມາຈາກຕ່າງປະເທດບໍ່ວ່າຈະເປັນຄົນຈີນ ຫຼື ຄົນຕ່າງຊາດ ແລະ ຈະໃຊ້ສະຖານທີ່ນີ້ເປັນບ່ອນກັກໂຕແທນໂຮງແຮມທຸກບ່ອນໃນເມືອງກວາງໂຈ.
ທັງນີ້, ທາງການຂອງປະເທດຈີນຕ້ອງການໃຫ້ຜູ້ທີ່ເດີນທາງມາຈາກຕ່າງປະເທດເຂົ້າກັກໂຕພາຍໃນພື້ນທີ່ດຽວກັນໝົດ ເພື່ອໃຫ້ງ່າຍຕໍ່ການເບິ່ງແຍງ ແລະ ເພື່ອຫຼຸດຄວາມສ່ຽງໃຫ້ແກ່ປະຊາຊົນໃນພື້ນທີ່ຈາກການຕິດເຊື້ອໂຄວິດ-19 ອີກດ້ວຍ. ເມື່ອຄົນຕ່າງປະເທດຜ່ານຈຸດກວດຄົນເຂົ້າເມືອງແລ້ວ ເຈົ້າໜ້າທີ່ຈະເຄື່ອນຍ້າຍທຸກຄົນມາທີ່ສູນກັກໂຕແຫ່ງນີ້ທັນທີ ແລະ ທຸກຄົນຕ້ອງຢູ່ສູນກັກໂຕແຫ່ງນີ້ຫ້ອງລະ 1 ຄົນ ເປັນເວລາຢ່າງໜ້ອຍ 14 ມື້.
ແຫຼ່ງຂ່າວ: Dailynews