ວັນທີ 30 ກັນຍາ 2021 ສໍານັກຂ່າວ Theguardian ລາຍງານວ່າ ຄິມຈອງອຶນ ຜູ້ນໍາເກົາຫຼີເໜືອ ໄດ້ກ່າວໃນສະພາວ່າ ການຕິດຕໍ່ຂໍເຈລະຈາຂອງລັດຖະບານອາເມລິກາ ພາຍໃຕ້ການນໍາພາຂອງປະທານາທິບໍດີ ໂຈ ໄບເດນ ເປັນພຽງແຕ່ເປືອກນອກທີ່ມີເຈດຕະນາຮ້າຍເອົາໄວ້ ທີ່ບໍ່ໄດ້ປ່ຽນໄປຈາກລັດຖະບານຊຸດເກົ່າເລີຍ.
ໃນຊ່ວງທີ່ຜ່ານມາ, ລັດຖະບານອາເມລິກາ ພະຍາຍາມຂໍໂອ້ລົມກັບເກົາຫຼີເໜືອ ເຖິງເລື່ອງການປົດອາວຸດນິວເຄຍ ເພື່ອແລກກັບການຍົກເລີກນະໂຍບາຍຂ້ວມບາດມາຕະຫຼອດ ແຕ່ກໍບໍ່ໄດ້ຄໍາຕອບຮັບຈາກເກົາຫຼີເໜືອ. ລ່າສຸດ, ສື່ທ້ອງຖິ່ນຂອງລັດຖະບານເກົາຫຼີເໜືອເຜີຍວ່າ ຄິມຈອງອຶນ ໄດ້ກ່າວປະນາມຂໍ້ສະເໜີຍັງບໍ່ປ່ຽນໄປ ແຕ່ກັບມີກົນອຸບາຍຫຼາຍຂຶ້ນ.
ຢ່າງໃດກໍຕາມ, ຄິມຈອງອຶນ ໄດ້ສະແດງໃຫ້ເຫັນວ່າ ຕ້ອງການທີ່ຈະກັບມາເປີດການນໍາໃຊ້ໂທລະສັບ ລະຫວ່າງເກົາຫຼີເໜືອ ແລະ ເກົາຫຼີໃຕ້ອີກຄັ້ງໃນເດືອນ ຕຸລາ 2021 ນີ້ ເພື່ອສະແດງໃຫ້ເຫັນເຖິງການຮັບຮູ້ເຖິງຄວາມຕ້ອງການຂອງປະຊາຊົນ ທີ່ເນັ້ນໃສ່ຄວາມສໍາພັນລະຫວ່າງທັງສອງຝັ່ງຂອງເກົາຫຼີ ໃຫ້ດີຂຶ້ນ ແລະ ນໍາໄປສູ່ສັນຕິພາບທີ່ຍາວນານ.
ໃນ 1 ເດືອນຜ່ານມາ ສະຖານະການຢູ່ເກົາຫຼີເໜືອເກີດຄວາມເຄັ່ງຕຶງຂຶ້ນອີກຄັ້ງ ຫຼັງຈາກທີ່ເກົາຫຼີເໜືອໄດ້ທົດລອງລູກສອນໄຟ 3 ເທື່ອ ເຮັດໃຫ້ປະເທດອ້ອມຂ້າງເຊັ່ນ ເກົາຫຼີໃຕ້ ແລະ ຍີ່ປຸ່ນ ລວມທັງອາເມລິກາ ທີ່ເປັນພັນທະມິດກັບປະເທດຊາດ ກຳລັງຕິດຕາມສະຖານະການຢ່າງໃກ້ຊິດ.
ອ້າງອີງ: