ກະຊວງສາທາລະນະສຸກໄດ້ມອບລົດນຳສົ່ງຄົນເຈັບ (Ambulance) ຈຳນວນ 50 ຄັນ ໃຫ້ແກ່ໂຮງໝໍສູນກາງ ແລະ ໂຮງໝໍຊຸມຊົນທົ່ວປະເທດ ເພື່ອຮັບໃຊ້ເຂົ້າໃນວຽກງານສາທາລະນະສຸກ, ເຊິ່ງເປັນລົດທີ່ໄດ້ຮັບຈາກລັດຖະບານ ໂດຍທຶນກູ້ຢືມຈາກທະນາຄານພັດທະນາອາຊີ.
ທ່ານ ດຣ. ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ ໄດ້ກ່າວວ່າ ລົດຈຳນວນດັ່ງກ່າວຈະໄດ້ນຳໃຊ້ເຂົ້າໃນການບໍລິການສາທາລະນະສຸກ ບໍ່ວ່າຈະເປັນການຮັບໃຊ້ວຽກງານໂຄວິດ ກໍຄືການບໍລິການຮັບ-ສົ່ງຄົນເຈັບທົ່ວໄປໃຫ້ມີປະສິດທິພາບ, ເພື່ອແກ້ໄຂບັນຫາການນຳສົ່ງ ທັງຮັບປະກັນການເຂົ້າເຖິງການບໍລິການຂອງປະຊາຊົນບັນດາເຜົ່າ, ລວມທັງແມ່ຍິງ ແລະ ເດັກນ້ອຍ ເພື່ອເຮັດໃຫ້ບັນລຸແຜນພັດທະນາສາທາລະນະສຸກ 5 ປີຄັ້ງທີ IX, ບັນລຸ 11 ຕົວຊີ້ບອກ ແລະ ເຮັດໃຫ້ ສປປລາວ ຫຼຸດພົ້ນຈາກຄວາມທຸກຍາກ.
ໃນພິທີມອບຮັບຄັ້ງນີ້, ມີ 11 ແຂວງ, ນະຄອນຫຼວງ, ໂຮງໝໍ 103 ກອງທັບ ແລະ ສູນປິ່ນປົວ ແລະ ຮັກສາສຸຂະພາບຕາ. ນອກຈາກນີ້, ກະຊວງສາທາລະນະສຸກຍັງຈະໄດ້ຮັບການຊ່ວຍເຫຼືອຈາກລັດຖະບານຍີ່ປຸ່ນຕື່ມ 81 ຄັນ ເຊິ່ງໄດ້ແຈກຢາຍໄປກ່ອນໜ້ານີ້ 7 ຄັນ ສ່ວນທີ່ເຫຼືອ 74 ຄັນ ແມ່ນຈະໄດ້ແຈກຢາຍໃຫ້ບັນດາໂຮງໝໍແຂວງ, ໂຮງໝໍຊຸມຊົນ ທີ່ຍັງບໍ່ທັນໄດ້ຮັບ.
ພິທີມອບຮັບລົດນຳສົ່ງຄົນເຈັບຈຳນວນ 50 ຄັນຄັ້ງນີ້ຈັດຂຶ້ນໃນວັນທີ 27 ກັນຍາ 2021 ທີ່ກະຊວງສາທາລະນະສຸກ, ກ່າວມອບໂດຍທ່ານ ດຣ. ສະໜອງ ທອງຊະນະ, ຮອງລັດຖະມົນຕີກະຊວງສາທາລະນະສຸກ ໂດຍມີຕາງໜ້າຈາກພະແນກສາທາລະນະສຸກທົ່ວປະເທດເປັນຜູ້ຮັບ.