ວັນທີ 26 ກັນຍາ 2021 ເວັບໄຊ້ The star ແລະ ໜັງສືພິມຂອງຫວຽດນາມ ລາຍງານວ່າ ນາຍົກລັດຖະມົນຕີ Phạm Minh Chính (ຟາມມິ່ງຈິງ) ຂອງຫວຽດນາມເປີດເຜີຍວ່າ ໄດ້ມີການກຽມຜ່ອນຄາຍມາດຕະການເຂັ້ມງວດຂອງການລ໋ອກດາວ ທີ່ປະກາດໃຊ້ມາ 1 ເດືອນເຕັມ ໃນອາທິດໜ້າ ແລະ ອະນຸຍາດໃຫ້ທຸລະກິດຕ່າງໆ ສາມາດເລີ່ມດໍາເນີນການຜະລິດໄດ້ອີກຄັ້ງ ເພື່ອໃຫ້ຫວຽດນາມກັບມາສູ່ສະພາວະປົກກະຕິ ແລະ ມີການຟື້ນຟູເສດຖະກິດພາຍໃນທ້າຍເດືອນນີ້ ຫຼັງຈາກຈໍານວນຜູ້ຕິດເຊື້ອຫຼຸດລົງຕໍ່າກວ່າ 10,000 ລາຍ ເປັນເວລາ 3 ມື້ຕິດຕໍ່ກັນ.
ຜູ້ນໍາຫວຽດນາມກ່າວວ່າ ກ່ອນໜ້ານີ້ ໃນທີ່ປະຊຸມຄະນະກໍາມະການແຫ່ງຊາດວ່າດ້ວຍການຄວບຄຸມ ແລະ ການປ້ອງກັນພະຍາດໂຄວິດ-19 ເຫັນດີນໍາກັນວ່າ ແນວຄິດການປັບປ່ຽນແຜນກົນລະຍຸດ Zero Covid (ໃຫ້ຈໍານວນຜູ້ຕິດເຊື້ອໂຄວິດກັບມາເປັນ 0) ມາເປັນ ການປັບຕົວຢູ່ຢ່າງປອດໄພ ແລະ ຄວບຄຸມການແຜ່ລະບາດຂອງໂຄວິດ-19 ຢ່າງມີປະສິດທິພາບ.
ຫວຽດນາມີຈໍານວນຜູ້ເສຍຊີວິດລາຍວັນຫຼຸດລົງ ແລະ ພົບຜູ້ຕິດເຊື້ອໃໝ່ 9,682 ຄົນ ໃນວັນເສົາ ທີ 25 ກັນຍາ ທີ່ຜ່ານມາ, ເຊິ່ງນັບວ່າເປັນມື້ທີ່ 3 ຕິດຕໍ່ກັນທີ່ມີຜູ້ຕິດເຊື້ອໃໝ່ຫຼຸດລົງ. ຢ່າງໃດກໍຕາມ, ວັນທີ 26 ກັນຍາ ທີ່ຜ່ານມາ ໂຕເລກຜູ້ຕິດເຊື້ອໃໝ່ໄດ້ກັບມາຢູ່ທີ່ 10,011 ຄົນ ເຊິ່ງຈໍານວນຜູ້ຕິດເຊື້ອສະສົມຢູ່ທີ່ 756,689 ຄົນ ແລະ ມີຜູ້ເສຍຊີວິດສະສົມ 18,584 ສົບ.