ເວັບໄຊ Channel News Asia ລາຍງານ: ປະທານບໍລິຫານບໍລິສັດໂມເດີຣ໌ນາເຊື່ອວ່າ ຈະສາມາດຄວບຄຸມການແຜ່ລະບາດຂອງພະຍາດໂຄວິດ-19 ໄດ້ພາຍໃນ 1 ປີ ພາຍຫຼັງມີການຜະລິດວັກຊີນອອກມາຈົນພຽງພໍຕໍ່ຄວາມຕ້ອງການຂອງປະຊາກອນທົ່ວໂລກ ພ້ອມຮຽກຮ້ອງລາຍປະເທດກຽມອະນຸມັດການສັັກວັກຊີນກະຕຸ້ນເຂັມທີ 3.
ທ່ານ ສະເຕຟານ ແບນແຊລ, ຜູ້ບໍລິຫານລະດັບສູງສຸດຂອງບໍລິສັດໂມເດີຣ໌ນາ ໃຫ້ສຳພາດຕໍ່ໜັງສືພິມສະວິສເຊີແລນວ່າ: ວິກິດການລະບາດຂອງພະຍາດໂຄວິດຈະຢຸດຕິລົງໄດ້ໃນເວລາ 1 ປີ ເມື່ອມີການເພີ່ມປະລິມານການຜະລິດວັກຊີນໃຫ້ພຽງພໍກັບປະຊາກອນໂລກ ເຊິ່ງເຫັນໄດ້ວ່າ ໃນຊ່ວງ 6 ເດືອນຜ່ານມາ ມີການຂະຫຍາຍຖານການຜະລິດວັກຊີນເປັນວົງກວ້າງ ຂະນະທີ່ຜູ້ຍັງບໍ່ໄດ້ຮັບວັກຊີນກໍຈະມີການສ້າງພູມຄຸ້ມກັນຂຶ້ນມາດ້ວຍຕົນເອງຕາມທຳມະຊາດແຕ່ກໍຍັງບໍ່ສາມາດປ້ອງກັນການຕິດເຊື້ອໄດ້ຫາກດຳລົງຊີວິດຢູ່ໃນຈຸດສ່ຽງ ແລະການສີດວັກຊີນປ້ອງກັນໂຄວິດໃນແຕ່ລະປີແມ່ນຖືເປັນສິ່ງສຳຄັນ ເພື່ອເຊື້ອພະຍາດດັ່ງກ່າວຍັງຈະຄົງຢູ່ກັບໂລກມະນຸດອີກດົນຄ້າຍຄືກັບໄຂ້ຫວັດໃຫຍ່.
ຜູ້ບໍລິຫານລະດັບສູງຍັງໄດ້ຮຽກຮ້ອງໃຫ້ລັດຖະບານຫຼາຍປະເທດຄວນມີການອະນຸມັດການສັກວັກຊີນກະຕຸ້ນເຂັມທີ 3 ໃຫ້ແກ່ຜູ້ທີ່ໄດ້ຮັບວັກຊີນຄົບສອງໂດສ ເຊິ່ງວັກຊີນເຂັມກະຕຸ້ນແມ່ນຈະມີການນຳໃຊ້ພຽງເຄິ່ງໂດສຂອງປະລິມານໂດສເດີມ ພ້ອມເຊື່ອວ່າວັກຊີນຈະພຽງພໍຕໍ່ຄວາມຕ້ອງການຂອງປະຊາກອນທົ່ວໂລກໃນກາງປີໜ້າ ທັງຢືນຢັນວ່າ ໂມເດີຣ໌ນາມີການພັດທະນາວັກຊີນໄປຕະຫຼອດເພື່ອໃຫ້ທັນກັບສາຍພັນທີ່ປ່ຽນແປງໄປໜ້າເລື້ອຍໆ ພ້ອມວາງແຜນຈະໃຊ້ສີດວັກຊີນໃຫ້ກັບເດັກແຮກເກີດໃນອະນາຄົດນຳອີກ.