ເວັບໄຊໄທຣັດລາຍງານ: ປະທານາທິບໍດີໂຈ ໄບເດນ ໄດ້ຮຽກຮ້ອງໃຫ້ນານາຊາດຮ່ວມມືກັນໃນກອງປະຊຸມສະມັດຊາໃຫຍ່ຂອງອົງການສະຫະປະຊາຊາດ ທີ່ຈັດຂຶ້ນຄັ້ງທີ 76 ທີ່ນະຄອນນິວຢອກ ໃນມື້ວານນີ້ ທ່າມກາງຄວາມຕຶງຄຽດລະຫວ່າງສະຫະລັດອາເມລິກາກັບບັນດາປະເທດພັນທະມິດ ບວກກັບສະພາບການລະບາດຂອງພະຍາດໂຄວິດ ແລະ ວິກິດການປ່ຽນແປງຂອງສະພາບອາກາດ ຍິ່ງເຮັດໃຫ້ຄວາມແຕກແຍກພາຍໃນໂລກປາກົດເຫັນໄດ້ຊັດເຈນຂຶ້ນ.
ກອງປະຊຸມ UN ຄັ້ງນີ້ ປະທານາທິບໍດີໄບເດນໄດ້ເຂົ້າຮ່ວມເປັນຄັ້ງທຳອິດ ພ້ອມຢືນຢັນຈະໃຫ້ການສະໜັບສະໜູນປະຊາທິປະໄຕ ແລະວິທີທາງການທູດ ພາຍຫຼັງສຳເລັດເລື່ອງຂໍ້ຕົກລົງກ່ຽວກັບເຮືອດຳນໍ້າພະລັງງານິວເຄຼຍໃຫ້ແກ່ອົດສະຕາລີ ຈົນເຮັດໃຫ້ຝຣັ່ງເສດ ແລະສະຫະພາບເອີຣົບບໍ່ພໍໃຈ ພ້ອມຢໍ້າຕື່ມວ່າ ສະຫະລັດບໍ່ໄດ້ມີເຈຕະນາຈະສ້າງສົງຄາມເຢັນຄັ້ງໃໝ່ ຫຼື ແບ່ງແຍກໂລກເປັນກຸ່ມກ້ອນແຕ່ຢ່າງໃດ ທັງພ້ອມທີ່ຈະເຮັດວຽກຮ່ວມກັນ ເພື່ອຊອກຫາທາງອອກຢ່າງສັນຕິ.
ຜູ້ນຳສະຫະລັດຍັງໃຫ້ຄຳໝັ້ນສັນຍາເລື່ອງງົບປະມານເພື່ອຕໍ່ສູ້ກັບວິກິດສະພາບອາກາດ ໂດຍສະຫະລັດຈະເພີ່ມງົບປະມານຂຶ້ນທົບເທົ່າສຳລັບປະເທດກຳລັງພັດທະນາ ພ້ອມທັງເວົ້າເຖິງກໍລະນີການຖອນທະຫານອອກຈາກອັຟການິດສະຖານ ເຊິ່ງຖືກວິພາກວິຈານຢ່າງໜັກໜ່ວງທັງພາຍໃນ ແລະ ພາຍນອກ ໂດຍລະບຸວ່າ ສະຫະລັດໄດ້ຢຸດຕິຊ່ວງເວລາຂອງສົງຄາມອັນຍາວນານເພື່ອຍຸກໃໝ່ທາງການທູດ.