ວັນທີ 19 ກັນຍາ 2021 CNN ລາຍງານວ່າ ຍິງທີ່ມີຊື່ວ່າ Gabby Petito ອາຍຸ 22 ປີ ໄດ້ຫາຍໂຕໄປ ຫຼັງອອກທຣິບຂັບລົດເດີນທາງໄປທ່ອງທ່ຽວກັບຄູ່ໝັ້ນ ທີ່ມີຊື່ວ່າ Brian Laundrie ຕັ້ງແຕ່ວັນທີ 2 ກໍລະກົດ ຈາກ ລັດຟໍລິດ້າ ໄປທ່ອງທ່ຽວທົ່ວອາເມລິກາ ຕະຫຼອດການເດີນທາງ Gabby ໄດ້ຕິດຕໍ່ກັບຜູ້ເປັນແມ່ ແລະ ຄອບຄົວຢູ່ສະເໝີ ແຕ່ເມື່ອຮອດວັນທີ 30 ສິງຫາ ຄອບຄົວກໍບໍ່ສາມາດຕິດຕໍ່ກັບ Gabby ໄດ້ອີກ.
ຈົນມາວັນທີ 2 ກັນຍາ Brian ກໍກັບມາບ້ານຄົນດຽວ ແລະ ໂທຫາທະນາຍ ໂດຍປະຕິເສດທີ່ຈະໂອ້ລົມໃດໆກັບຄອບຄົວຂອງ Gabby ແລະ ບໍ່ຍອມບອກວ່າ Gabby ຢູ່ໃສ.
ຄອບຄົວຂອງ Gabby ຮູ້ສຶກກະວົນກະວາຍ ເປັນຫ່ວງລູກສາວຈົນກິນບໍ່ໄດ້ນອນບໍ່ຫຼັບ, ຮອດວັນທີ 11 ກັນຍາ ຄອບຄົວຂອງ Gabby ຕັດສິນໃຈແຈ້ງຕໍາຫຼວດເນື່ອງຈາກການຫາຍໂຕໄປຂອງລູກສາວ ແລະ ບໍ່ສາມາດຕິດຕໍ່ໄດ້.
ຫຼັງຈາກນັ້ນ 3 ມື້ (ວັນທີ 14 ກັນຍາ) ຕໍາຫຼວດໄດ້ປະກາດວ່າ Brian Laundrie ຫາຍໂຕໄປ ຫຼັງຮູ້ວ່າຄອບຄົວຂອງ Gabby ແຈ້ງຕໍາຫຼວດ, ຫຼາຍຝ່າຍສັນນິຖານວ່າເຂົາກໍາລົງຫຼົບໜີ ຫຼື ບ່ຽງເບນຄວາມສົນໃຈໃນການຕາມຫາໂຕຂອງ Gabby.
ລ່າສຸດ, ແຫຼ່ງຂ່າວຈາກ Foxnews ໄດ້ລາຍງານວ່າ ເຈົ້າໜ້າທີ່ໄດ້ປະກາດ ພົບສົບຍິງສາວ ໃນບໍລິເວນອຸທິຍານແຫ່ງຊາດ Grand Teton ໃນລັດ wyoming ຕໍາຫຼວດກ່າວວ່າສົບດັ່ງກ່າວ ມີລັກສະນະຄ້າຍຄືກັບ Gabby ທີ່ຫາຍໂຕໄປ ແລະ ຢືນຢັນໃນເວລາຕໍ່ມາວ່າ ສົບດັ່ງກ່າວແມ່ນ Gabby Petito. ການສອບສວນຍັງຕ້ອງດໍາເນີນຕໍ່ໄປ ໂດຍທີ່ຕໍາຫຼວດ ກໍາລັງຕິດຕາມໂທລະສັບຂອງທັງ Gabby ແລະ Brian ເນື່ອງຈາກຕໍາຫຼວດໄດ້ສົ່ງທີມເຈົ້າໜ້າທີ່ ຈໍານວນ 50 ຄົນ ເຂົ້າໄປໃນ Carlton Reserve ທີ່ເຕັມໄປດ້ວຍອັນຕະລາຍ ເພື່ອຄົ້ນຫາ Brian ມາສືບສວນ.
ປັດຈຸບັນ, ເຈົ້າໜ້າທີ່ຕໍາຫຼວດ North Port ຍັງຄົງຄົ້ນຫາ Brian ຕໍ່ໄປ ເພາະ Brian Laundrie ໄດ້ກາຍເປັນຜູ້ຕ້ອງສົງໄສທີ່ຖືກສັນນິຖານວ່າ ເປັນຜູ້ລົງມືຂ້າ Gabby Petito ໄປແລ້ວ.
Gabby ແລະ Brian ທັງສອງໄດ້ເດີນທາງພະຈົນໄພໄປທົ່ວອາເມລິກາດ້ວຍລົດຕູ້ສີຂາວ ຕັ້ງແຕ່ຕົ້ນປີ ພວກເຂົາໄດ້ສ້າງເວັບໄຊ້ ແລະ ເປີດບັນຊີ Youtube ເພື່ອບັນທຶກເລື່ອງລາວການເດີນທາງຂອງພວກເຂົາ ເຊິ່ງຜູ້ຕິດຕາມຈະໄດ້ເຫັນພາບທີ່ມີຄວາມສຸກ ແລະ ຮອຍຍິ້ມຂອງພວກເຂົາ ໂດຍບໍ່ຄິດວ່າຈະມີເລື່ອງດັ່ງກ່າວເກີດຂຶ້ນ.