ເວັບໄຊ Latimes ລາຍງານ: ຄະນະບໍລິຫານຂອງປະທານາທິບໍດີໄບແດນ ໄດ້ສະແດງຄວາມບໍ່ພໍໃຈຕໍ່ຄູ່ແຂ່ງເຊັ່ນຈີນ ແລະ ຝຣັ່ງເສດ ໜຶ່ງໃນພັນທະມິດທີ່ໃກ້ຊິດຂອງຈີນ ທີ່ໄດ້ກ່າວໂຈມຕີຂໍ້ຕົກລົງສະຫະລັດໃນເລື່ອງທີ່ຈະຊ່ວຍອົດສະຕາລີພັດທະນາເຮືອດຳນ້ຳພະລັງງານນິວເຄຼຍ ພ້ອມຂູ່ຈະເພີ່ມຄວາມຕຶງຄຽດກັບປັກກິ່ງໃນທັນທີ ແລະ ອາດທຳລາຍຄວາມສຳພັນທີ່ດີກັບປາຣີ.
ເຮືອດຳນໍ້າພະລັງງານນິວເຄຼຍທີ່ຈະສົ່ງມອບໃຫ້ກັບອົດສະຕາລີຄັ້ງນີ້ແມ່ນມີລັກສະນະປອດໄພ, ວ່ອງໄວ, ສາມາດເດີນທາງໄດ້ໄກກວ່າ ແລະ ເລິກກວ່າ ພ້ອມມີຄວາມຊັບຊ້ອນຫຼາຍກວ່າເຮືອດຳນໍ້າທົ່ວໄປ ເຊິ່ງຂໍ້ຕົກລົງດັ່ງກ່າວ ຖືເປັນບາດກ້າວສຳຄັນໃນການປະຕິບັດຕາມຄຳປະຕິຍານທີ່ ໄບເດນ ເຄີຍກ່າວວ່າ ຈະມີການຈັດຕັ້ງພັນທະມິດທີ່ຍິ່ງໃຫຍ່ ເພື່ອຄວບຄຸມອິດທິພົນທາງດ້ານເສດຖະກິດ ແລະ ການທະຫານຂອງຈີນໃນພາກພື້ນອິນໂດ-ປາຊີຟິກ.
ປັກກິ່ງໄດ້ສະແດງຄວາມບໍ່ພໍໃຈຕໍ່ຂໍ້ຕົກລົງດັ່ງກ່າວ ໂດຍວິພາກວິຈານຂໍ້ຕົກລົງດັ່ງກ່າວວ່າ ເປັນການຍອມຮັບແນວຄິດສົງຄາມເຢັນທີ່ຈະກະຕຸ້ນການແຂ່ງຂັນດ້ານອາວຸດ ເຊິ່ງເປັນໄພຄຸກຕາມສັນຕິພາບ ແລະ ຄວາມໝັ້ນຄົງໃນພາກພື້ນ, ຂະນະທີ່ຜູ້ນຳຝຣັ່ງເສດກໍສະແດງຄວາມບໍ່ພໍໃຈເຊັ່ນກັນ ເນື່ອງຈາກເຄີຍຕົກລົງກັນມາກ່ອນວ່າ ຝຣັ່ງເສດຈະຂາຍເຮືອດຳນ້ຳແບບທຳມະດາໃຫ້ອົດສະຕາລີ.
ຢ່າງໃດກໍຕາມ, ເຈົ້າໜ້າທີ່ຝ່າຍບໍລິຫານຂອງສະຫະລັດກ່າວອ້າງວ່າ ຂໍ້ຕົກລົງດັ່ງກ່າວບໍ່ໄດ້ເປັນການມຸ່ງເປົ້າໄປທີ່ປັກກິ່ງແຕ່ຢ່າງໃດ ເຖິງແມ່ນຜູ້ຊ່ຽວຊານສ່ວນໃຫຍ່ຈະເບິ່ງເຫັນວ່າການຕັດສິນໃຈດັ່ງກ່າວອາດມີເງື່ອນງຳກໍຕາມ.