ພະຍຸເຂດເຂດຮ້ອນໂກນເຊີນໄດ້ພັດຖະຫຼົ່ມເຂົ້າຫຼາຍໝູ່ບ້ານໃນບັນດາແຂວງພາກໃຕ້ຂອງລາວ ໃນຊ່ວງຕອນແລງຂອງວັນທີ 11 ກັນຍາຜ່ານມາ. ໃນນັ້ນ, ບ້ານໂພນໃຜ່, ເມືອງ ແລະ ແຂວງສາລະວັນ ໄດ້ຮັບຜົນກະທົບໜັກພໍສົມຄວນ ເຮັດໃຫ້ປະຊາຊົນ 139 ຄົນຂາດທີ່ຢູ່ອາໄສ, ຂະນະທີ່ມີຜູ້ເສຍຊີວິດ 1 ລາຍ ແລະ ບາດເຈັບສາຫັດ 2 ຄົນ.

ຕາມການລາຍງານຈາກວິທະຍຸກະຈາຍສຽງແຫ່ງຊາດລາວ ຮູ້ວ່າ: ພະຍຸເຂດເຂດຮ້ອນໂກນເຊີນໄດ້ພັດຖະຫຼົ່ມເຂົ້າບ້ານເຮືອນປະຊາຊົນບ້ານໂພນໃຜ່ ເຮັດໃຫ້ມີເຮືອນລົ້ມ, ຫຼັງຄາເລີກ ຈຳນວນ 75 ຫຼັງ ໃນນັ້ນເສຍຫາຍໜັກ 20 ຫຼັງຄາເຮືອນ, ເສຍຫາຍປານກາງ 45 ຫຼັງຄາເຮືອນ ແລະ ເສຍຫາຍເລັກນ້ອຍ 10 ຫຼັງຄາເຮືອນ, ເຮັດໃຫ້ມີຜູ້ເສຍຊີວິດ 1 ຄົນ ເພດຍິງ ອາຍຸ 50 ກວ່າປີ, ບາດເຈັບສາຫັດ 02 ຄົນ ແລະ ບາດເລັກນ້ອຍ 06 ຄົນ ແລະ ປະຈຸບັນລວມ 139 ຄົນ ຂາດທີ່ຢູ່ອາໄສ.

ອຳນາດການປົກຄອງແຂວງ ແລະ ເມືອງ ໄດ້ມີການຄົ້ນຄ້ວາ, ແຕ່ງຕັ້ງຄະນະຮັບຜິດຊອບລົງຊ່ວຍເຫຼືອພໍ່ແມ່ປະຊາຊົນ, ຈັດຫາທີ່ພັກພາອາໄສເປັນການຊົ່ວຄາວ ແລະຈັດວາງກຳລັງປ້ອງກັນຊາດ-ປ້ອງກັນຄວາມສະຫງົບ ເຂົ້າຊ່ວຍເຫຼືອສ້ອມແປງເຮືອນໃຫ້ພໍ່ແມ່ປະຊາຊົນຢ່າງຮີບດ່ວນ.