ເວັບໄຊ The Guardian ລາຍງານ: ທ່ານ ນາງ ມາເຣຍ ຄາເລສນິກາວາ (Maria Kalesnikava) ໜຶ່ງໃນຜູ້ນຳຝ່າຍຄ້ານທີ່ໂດດເດັ່ນ ທີ່ເປັນສັດຕູຄົນສຳຄັນຂອງ ອາເລັກຊານເດີ ລູຄາເຊນໂຄ, ຜູ້ນຳຜະເດັດການຂອງປະເທດ ຖືກຕັດສິນຈຳຄຸກເປັນເວລາ 11 ປີ ຂໍ້ຫາສົມຮູ້ຮ່ວມຄິດໃນການຢຶດອຳນາດ.

ນາງ ມາເຣຍ ຄາເລສນິກາວາ ເປັນໜຶ່ງໃນຜູ້ນຳຍິງສາມຄົນຂອງຝ່າຍຄ້ານປະທານາທິບໍດີຜະເດັດການ ລູຄາເຊນໂຄ, ໄດ້ນຳພາປະຊາຊົນຊາວເບລາຣຸສຫຼາຍໝື່ນຄົນລຸກຮື້ຂຶ້ນປະທ້ວງຄັ້ງໃຫຍ່ສຸດເມື່ອປີກາຍ ກ່ອນຖືກຈັບກຸມໃນເດືອນກັນຍາຂອງປີດຽວກັນ ພ້ອມນຳຕົວໄປທີ່ຊາຍແດນເຊິ່ງໄດ້ຮັບຄຳສັ່ງໃຫ້ໜີອອກນອກປະເທດ ແຕ່ຜູ້ນຳຄົນດັ່ງກ່າວໄດ້ຈີກໜັງສືເດີນທາງຖິ້ມ ພ້ອມສ່ຽງທີ່ຈະຢູ່ຄຸກແທນການລີ້ໄພ.

ອາເລັກຊານເດີ ລູຄາເຊນໂຄ, ປະທານາທິບໍດີເບລາຣຸສ ໄດ້ໃຊ້ຄວາມພະຍາຍາມຢ່າງເຕັມທີ່ໃນຊ່ວງຫຼາຍເດືອນຜ່ານມາ ເພື່ອລົງໂທດຝ່າຍກົງກັນຂ້າມທີ່ຕໍ່ຕ້ານລັດຖະບານ ພາຍໃຕ້ການດຳເນີນການທີ່ເອີ້ນວ່າ “ການກວາດລ້າງ” ອົງການທີ່ບໍ່ຊື່ສັດ ເຮັດໃຫ້ຜູ້ນຳຝ່າຍຄ້ານ ລວມທັງກຸ່ມຕໍ່ຕ້ານ ແລະນັກຂ່າວຂອງເບລາຣຸສຫຼາຍຄົນຈຳຕ້ອງໄດ້ອົບພະຍົບໜີໄປລີ້ໄພໃນປະເທດຕ່າງໆ.