ວັນທີ 5 ກັນຍາ 2021 ສໍານັກຂ່າວ AP ລາຍງານວ່າ: ໂຕເລກຜູ້ຕິດເຊື້ອ ໂຄວິດ-19 ໃນອາເມລິກາຍັງເພີ່ມຂຶ້ນຢ່າງໄວວາ ຈາກການແຜ່ລະບາດຂອງສາຍພັນເດວຕ້າ ໂດຍສະເພາະກຸ່ມຜູ້ປ່ວຍເດັກນ້ອຍ ແລະ ໄວໜຸ່ມ ທີ່ຍັງສູງ.
ຈໍານວນຜູ້ຕິດເຊື້ອໂຄວິດ-19 ໃນອາເມລິກາ ລ່າສຸດເພີ່ມຂຶ້ນສູງເຖິງ 39,90 ລ້ານຄົນ ແລະ ຍອດຜູ້ເສຍຊີວິສະສົມຢູ່ທີ່ 648,106 ສົບ ໂດຍເຊື້ອພັນເດວຕ້າເລີ່ມແຜ່ລະບາດລາມໄປເຖິງກຸ່ມເດັກນ້ອຍ ແລະ ໄວໜຸ່ມ ຈົນເຮັດໃຫ້ອັດຕາການເຂົ້າປິ່ນປົວໃນໂຮງໝໍເພີ່ມຂຶ້ນຢ່າງໄວວາ.
ສື່ຂອງອາເມລິກາລາຍງານວ່າ ໃນຮອບ 7 ວັນທີ່ຜ່ານມາ ຕົວເລກສະເລ່ຍຂອງຜູ້ຕິດເຊື້ອເພີ່ມລາຍວັນສູງເຖິງ 163,273 ຄົນ ຕໍ່ມື້ ນັບວ່າສູງຂຶ້ນຈາກອາທິດທີ່ແລ້ວເຖິງ 22%.
ນັບຕັ້ງແຕ່ທ້າຍເດືອນມິຖຸນາທີ່ຜ່ານມາ ຈົນຮອດກາງເດືອນສິງຫາ ອັດຕາການເຂົ້າປິ່ນປົວ ຂອງຜູ້ປ່ວຍສໍາລັບເດັກນ້ອຍ ແລະ ໄວໜຸ່ມ ເພີ່ມຂຶ້ນສູງເຖິງ 5 ເທົ່າ ເຊິ່ງເປັນຈັງຫວະດຽວກັບທີ່ກວດພົບການລະບາດຂອງເຊື້ອໂຄວິດ-19 ສາຍພັນເດວຕ້າເປັນວົງກວ້າງ, ອັດຕາການເຂົ້າປິ່ນປົວໃນໂຮງໝໍຂອງໄວໜຸ່ມທີ່ຍັງບໍ່ໄດ້ຮັບວັກຊັກຊີນຕ້ານໂຄວິດ-19 ສູງກວ່າຜູ້ທີ່ໄດ້ຮັບວັກຊີນຄົບແລ້ວ ເຖິງ 10 ເທົ່າ ໂດຍຈໍານວນຜູ້ຕິດເຊື້ອທັງໝົດໃນກຸ່ມໄວນຸ່ມແມ່ນອາຍຸລະຫວ່າງ 12-17 ປີ ແລະ ເດັກນ້ອຍອາຍຸຕໍ່າກວ່າ 4 ປີ.