ເວັບໄຊໄທຣັດລາຍງານ: ເມືອງນິວຢອກ ແລະ ຟີລາເດລເຟຍ, ສະຫະລັດອາເມລິກາເກີດນໍ້າຖ້ວມຮຸນແຮງພາຍຫຼັງພະຍຸເຮີຣີເຄນໄອດາພັດຖະຫຼົ່ມ ພາໃຫ້ມີຝົນຕົກໜັກຕິດຕໍ່ກັນຫຼາຍວັນ ນັບແຕ່ວັນທີ 1 ກັນຍາ ເປັນຕົ້ນມາ ຂະນະທີ່ປັດຈຸບັນມີລາຍງານຜູ້ເສຍຊີວິດແລ້ວ 41 ລາຍ.
ເຈົ້າໜ້າທີ່ສະຫະລັດກຳລັງດຳເນີນການຊ່ວຍເຫຼືອ ແລະ ອົບພະຍົບປະຊາຊົນທີ່ໄດ້ຮັບຜົນກະທົບຈາກນໍ້າຖ້ວມໃນຫຼາຍພື້ນທີ່ທາງຕາເວັນອອກສ່ຽງເໜືອຂອງປະເທດ ໂດຍສະເພາະນະຄອນນິວຢອກ, ຟີລາເດລເຟຍ ແລະອື່ນໆ ເຊິ່ງເປັນຜົນມາຈາກພະຍຸເຮີຣີເຄນໄອດາ ເຮັດໃຫ້ການຈະລາຈອນຕາມທ້ອງຖະໜົນກາຍເປັນອຳມະພາດ ສ່ວນການເດີນທາງທາງອາກາດຂອງສະໜາມບິນບາງແຫ່ງກໍໄດ້ຮັບຜົນກະທົບ ເຮັດໃຫ້ຖ້ຽວບິນຈຳນວນ 350 ຖ້ຽວຖືກຍົກເລີກ. ພ້ອມກັນນັ້ນ, ມີປະຊາຊົນ 40 ກວ່າຄົນເສຍຊີວິດຈາກເຫດການນໍ້າຖ້ວມຄັ້ງນີ້.
ຫ້ອງການຄຸ້ມຄອງສະຖານະການສຸກເສີນຂອງລັດຖະບານກາງສະຫະລັດ (FEMA) ເປີດເຜີຍວ່າ ຂະນະນີ້ ໄອດາໄດ້ອ່ອນກຳລັງລົງຈາກພະຍຸດີເປຼຊັນເຂດຮ້ອນ ກາຍເປັນອະດີດພະຍຸໝູນເຂດຮ້ອນ (post-tropical cyclone) ແຕ່ຍັງຄາດການວ່າຈະມີຝົນຕົກໜັກເກີດຂຶ້ນອີກ.