ເວັບໄຊ້ Posttoday ໄດ້ລາຍງານວ່າ ທາງສໍານັກພິມແຫ່ງຊາດຂອງປະເທດຈີນໄດ້ອອກຂ່າວໃນໜັງສືພິມສ່ວນໜຶ່ງທີ່ເວົ້າເຖິງການປ້ອງກັນເຍົາວະຊົນຈາກການຕິດເກມອອນລາຍ ໂດຍຜູ້ໃຫ້ບໍລິການເກມອອນລາຍສາມາດໃຫ້ບໍລິການແກ່ເຍົາວະຊົນໄດ້ພຽງ 1 ຊົ່ວໂມງເທົ່ານັ້ນ ນັບຕັ້ງແຕ່ເວລາ 20:00 ໄປຈົນຮອດ 21:00 ໃນຄືນວັນສຸກ, ເສົາ ແລະ ອາທິດ.

ນອກຈາກນີ້ຍັງຮຽກຮ້ອງໃຫ້ໃຊ້ມາດຕະການການລົງທະບຽນ ແລະ ເຂົ້າສູ່ລະບົບການໃຊ້ງານດ້ວຍຊື່ແທ້ ໂດຍລະບຸວ່າຜູ້ໃຫ້ບໍລິການເກມອອນລາຍຈະຕ້ອງບໍ່ໃຫ້ບໍລິການແກ່ຜູ້ທີ່ບໍ່ລົງທະບຽນ ແລະ ລົງຊື່ເຂົ້າໃຊ້ງານທີ່ບໍ່ແມ່ນຊື່ແທ້.

ທັງນີ້ທາງດ້ານໜ່ວຍງານສື່ ແລະ ສິ່ງພິມທຸກລະດັບຂອງຈີນໄດ້ຮ້ອງຂໍໃຫ້ກໍາກັບດູແລບັງຄັບໃຊ້ມາດຕະການທີ່ກ່ຽວຂ້ອງ ແລະ ຈັດການກັບບໍລິສັດທີ່ບໍ່ນໍາໃຊ້ມາດຕະການດັ່ງກ່າວນີ້.