ເວັບໄຊ Post Today ລາຍງານ: ທ່ານ ຈູເລຍຣີ ບາຕູບາຣາ, ອະດີດລັດຖະມົນຕີກະຊວງກິດຈະການສັງຄົມຂອງອິນໂດເນເຊຍຖືກຕັດສິນຈຳຄຸກເປັນເວລາ 12 ປີ, ຂໍ້ຫາຮັບສິນບົນຈຳນວນ 1.2 ລ້ານໂດລາສະຫະລັດ ທີ່ກ່ຽວຂ້ອງກັບການຊ່ວຍເຫຼືອດ້ານສະບຽງອາຫານສຳລັບຄອບຄົວທີ່ທຸກຍາກທີ່ໄດ້ຮັບຜົນກະທົບຈາກການລະບາດໃຫຍ່ຂອງໂຄວິດ-19.
ອະດີດນັກການເມືອງລາຍນີ້ຖືກຈັບກຸມໃນເດືອນທັນວາປີກາຍ ພ້ອມກະເປົາເດີນທາງ, ແລະຊອງຂາວທີ່ເຕັມໄປດ້ວຍເງິນສົດ ຂະນະທີ່ສານໃນນະຄອນຫຼວງຈາກາຕ້າໄດ້ຕັດສິນຈຳຄຸກຈຳເລີຍ 12 ປີ ພ້ອມປັບໄໝຈຳນວນ 35.000 ໂດລາສະຫະລັດ ເຊິ່ງອະດີດນັກການເມືອງຄົນນີ້ຍັງໄດ້ຮັບຄຳສັ່ງໃຫ້ໃຊ້ແທນຄືນຄ່າເສຍຫາຍປະມານ 1 ລ້ານໂດລາສະຫະລັດ ຫຼື ອາດເພີ່ມໂທດຈຳຄຸກຕື່ມອີກ 2 ປີ.
ການຮັບສິນບົນຍັງກາຍເປັນບັນຫາໃຫຍ່ໃນອິນໂດເນເຊຍ ເຊິ່ງນັກການເມືອງຖືກຈັດເປັນກຸ່ມທຸດຈະລິດຫຼາຍທີ່ສຸດ ຂະນະທີ່ທາງໜ່ວຍງານຕໍ່ຕ້ານການທຸດຈະລິດຂອງປະເທດ ກໍໄດ້ຈັບກຸມເຈົ້າໜ້າທີ່ລັດຫຼາຍຄົນໃນຊ່ວງສອງສາມປີຜ່ານມາ ລວມເຖິງອະດີດລັດຖະມົນຕີກະຊວງປະມົງກໍຖືກຈັບກຸມໃນເດືອນກ່ອນ ພ້ອມຖືກຕັດສິນຈຳຄຸກ 5 ປີ ຂໍ້ຫາຮັບສິນບົນທີ່ກ່ຽວຂ້ອງກັບການສົ່ງອອກກຸ້ງກ້າມກາມ.