ເວັບໄຊຂ່າວໄທຣັດອອນໄລນ໌ລາຍງານ: ຄະນະກຳມະການດ້ານສຸຂະພາບຂອງຈີນ (NHC) ກ່າວໃນວັນທີ 23 ສິງຫາ ວ່າ: ຈີນບໍ່ມີຜູ້ຕິດເຊື້ອໂຄວິດສາຍພັນເດລຕ້າລາຍໃໝ່ພາຍໃນປະເທດເປັນຄັ້ງທຳອິດນັບແຕ່ທ້າຍເດືອນກໍລະກົດເປັນຕົ້ນມາ, ເຊິ່ງໄດ້ພິສູດໃຫ້ເຫັນວ່າ ການລັອກດາວແຕ່ຫົວທີຍັງສາມາດຄວບຄຸມການລະບາດຂອງສາຍພັນເດລຕ້າໄດ້.

ຈີນກວດພົບຜູ້ຕິດເຊື້ອສາຍພັນເດລຕ້າພາຍໃນປະເທດເປັນຄັ້ງທຳອິດໃນວັນທີ 20 ກໍລະກົດ ຈາກນັ້ນໄວຣັສກໍແຜ່ລະບາດເກືອບເຄິ່ງປະເທດ ທັງກວດພົບຜູ້ຕິດເຊື້ອໃໝ່ສູງເຖິງ 1.200 ຄົນ ຖືເປັນການລະບາດຄັ້ງໃຫຍ່ສຸດນັບແຕ່ຊ່ວງຕົ້ນປີ 2020, ແຕ່ລັດຖະບານກໍຮັບມືດ້ວຍວິທີການລັອກດາວຢ່າງເຂັ້ມງວດ ເຊິ່ງເປັນວິທີເດີມທີ່ຈັດຕັ້ງປະຕິບັດໄລຍະຜ່ານມາ ພ້ອມທັງເລັ່ງກວດຫາເຊື້ອພະຍາດໃຫ້ພົນລະເມືອງຂອງຕົນໂດຍໄວ ແລະຕິດຕາມກວດສອບທາມລາຍຜູ້ຕິດເຊື້ອຢ່າງຈິງຈັງ ທັງຈຳກັດການເດີນທາງພາຍໃນປະເທດ ເຮັດໃຫ້ຈຳນວນຜູ້ຕິດເຊື້ອລາຍວັນຫຼຸດລົງຢ່າງວ່ອງໄວ.

ຢ່າງໃດກໍຕາມ, ຈີນມີລາຍງານຜູ້ຕິດເຊື້ອລາຍໃໝ່ 21 ຄົນໃນວັນທີ 23 ສິງຫາ ແຕ່ເປັນຜູ້ເດີນທາງມາຈາກຕ່າງປະເທດທັງໝົດ ເຊິ່ງບໍ່ມີລາຍງານຜູ້ຕິດເຊື້ອພາຍໃນປະເທດແຕ່ຢ່າງໃດ.