ເວັບໄຊ້ Workpointtoday ໄດ້ລາຍງານວ່າ ຄົນໄທ 7 ຄົນທີ່ຂ້າມມາເກັບເຫັດຢູ່ໃນປ່າທີ່ເປັນເຂດແດນລະຫວ່າງຊາຍແດນລາວ-ໄທ ຈົນຫຼົງເຂົ້າມາ ສປປ ລາວ ກ່ອນຈະຖືກຈັບກຸມດໍາເນີນຄະດີເຂົ້າເມືອງແບບຜິດກົດໝາຍ ໄດ້ກັບຄືນປະເທດໄທແລ້ວ
ໃນວັນທີ 20 ສິງຫາ 2021 ຜູ້ວ່າລາດຊະການແຂວງ ອຸບົນລາດຊະທານີ ໄດ້ເຂົ້າຮັບຄົນໄທ 7 ຄົນ ຈາກ ຮອງເຈົ້າແຂວງຈໍາປາສັກ ກ່ອນທີ່ຈະສົ່ງໂຕທັງ 7 ຄົນໃຫ້ກັບເຈົ້າໜ້າທີ່ສາທາລະນະສຸກຂອງໄທປະຈໍາດ່ານສາກົນລາວ-ໄທ ເພື່ອກວດຫາເຊື້ອໂຄວິດ-19 ຕາມລະບຽບຂອງກະຊວງສາທາລະນະສຸກ.

ສໍາລັບຄົນໄທທັງ 7 ຄົນແມ່ນຖືກດໍາເນີນຄະດີໃນຂໍ້ຫາລັກເຂົ້າເມືອງແບບຜິດກົດໝາຍ ແລະ ຖືກປັບໄໝຄົນລະປະມານ 1,800,000 ກີບ ແລະ ທັງ 7 ຄົນນີ້ແມ່ນບໍ່ໄດ້ຮັບວັກຊີນໄຟເຊີຄືດັ່ງທີ່ເປັນຂ່າວກ່ອນໜ້ານີ້.