ສູນບໍລິຫານລັດດ້ວຍເອເລັກໂຕຣນິກ (ສລອ), ກະຊວງ ເຕັກໂນໂລຊີ ແລະ ການສື່ສານ (ກຕສ) ແລະ ບໍລິສັດ ສະຕາໂທລະຄົມ ຈຳກັດ ໄດ້ຕົກລົງຮ່ວມມືກັນເພື່ອສຶກສາຄົ້ນຄວ້າ ການຫັນເປັນລັດຖະບານດີຈີຕອນ ແລະ ປັບປຸງຟອນພາສາລາວໃຫ້ສົມບູນ ຮອງຮັບການບໍລິການຕ່າງໆທີ່ຫັນເປັນທັນສະໄໝ ໂດຍສະເພາະ ລະບົບບໍລິຫານລັດດ້ວຍເອເລັກໂຕຣນິກ ເປັນຕົ້ນ ການຄົ້ນຄວ້າພັດທະນາມາດຕະຖານລະບົບ Software/Program, Application ເພື່ອໃຫ້ບໍລິການທັງພາກລັດ, ຫົວໜ່ວຍທຸລະກິດ ແລະ ປະຊາຊົນທົ່ວໄປ.
ພາກສ່ວນກ່ຽວຂ້ອງຍັງຈະໄດ້ສຶກສາຄົ້ນຄວ້າ ການພັດທະນາລະບົບທຸລະກຳ ແລະ ການຄ້າທາງເອເລັກໂຕຣນິກ (Digital Payment and Commerce Platform) ເພື່ອເຊື່ອມໂຍງກັບລະບົບລັດຖະບານດິຈິຕອນ ແລະ ລະບົບລາຍເຊັນເອເລັກໂຕຣນິກ (e-Signature Platform) ເພື່ອສົ່ງເສີມການບໍລິຫານ ແລະ ບໍລິການລັດ ໃຫ້ທັນສະໄໝແລະ ຍັງຈະໄດ້ສຸມໃສ່ການຍົກລະດັບຄວາມຮູ້ຂອງພະນັກງານ ລັດຖະກອນ ທາງດ້ານເຕັກໂນໂລຊີດິຈິຕອນ ແລະ ອື່ນໆ ເພື່ອຮອງຮັບໃຫ້ກັບວຽກງານ ການຫັນເປັນລັດຖະບານດິຈິຕອນຂອງ ສປປ ລາວ ໂດຍໃຫ້ສອດຄ່ອງກັບແຜນພັດທະນາການຫັນເປັນລັດຖະບານດິຈີຕອນໃນປັດຈຸບັນ.
ພິທີເຊັນບົດບັນທຶກຄວາມເຂົ້າໃຈ (MOU) ໄດ້ຈັດຂຶ້ນໃນວັນທີ 20 ສິງຫາຜ່ານມາ, ເຂົ້າຮ່ວມລົງນາມຄັ້ງນີ້ ມີທ່ານ ທະວີສັກ ມະໂນທັມ ຫົວໜ້າສູນບໍລິຫານລັດດ້ວຍເອເລັກໂຕນິກ, ກະຊວງເຕັກໂນໂລຊີ ແລະ ການສື່ສານ ແລະ ທ່ານ ບຸນມີ ມາລາວົງ ຮອງຜູ້ອຳນວຍການໃຫຍ່ບໍລິສັດ ສະຕາໂທລະຄົມ ຈຳກັດ ໂດຍມີ ທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ທ່ານ ລີວ ແມ໋ງ ຮ່າ (Mr. Luu Manh Ha) ອຳນວຍການໃຫຍ່ບໍລິສັດ ສະຕາໂທລະຄົມ ຈຳກັດ ແລະ ພາກສ່ວນກ່ຽວຂ້ອງສອງຝ່າຍ ເຂົ້າຮ່ວມເປັນສັກຂີພິຍານ.
ຂໍ້ມູນຈາກ: Unitel Lao