ເວັບໄຊຂ່າວໄທຣັດລາຍງານ: ພະຍຸເຮີຣິເຄນເຮັນຣີໄດ້ອ່ອນກຳລັງລົງເປັນພະຍຸໂຊນຮ້ອນກ່ອນພັດເຂົ້າຖະຫຼົ່ມເຂດພາກໃຕ້ຂອງນິວອິງແລນ ຫຼື ບໍລິເວນຊາຍຝັ່ງທາງທິດຕາເວັນອອກສ່ຽງເໜືອຂອງສະຫະລັດອາເມລິກາ  ເຮັດໃຫ້ເກີດຝົນຕົກໜັກ ແລະ ລົມພັດແຮງ, ຫຼ້າສຸດມີລາຍງານຜູ້ເສຍຊີວິດ 22 ຄົນ.

ພະຍຸດັ່ງກ່າວໄດ້ເຮັດໃຫ້ເກີດຝົນຕົກໜັກ ແລະ ນໍ້າຖ້ວມໃນຫຼາຍເຂດ ເຊິ່ງລັດເທນເນສຊີ ເປັນພື້ນທີ່ທີ່ໄດ້ຮັບຄວາມເສຍຫາຍໜັກ ໂດຍມີລາຍງານຜູ້ເສຍຊີວິດ 22 ຄົນ ສ່ວນໃຫຍ່ແມ່ນແມ່ຍິງ ແລະ ເດັກນ້ອຍ ນອກນີ້ຍັງມີຜູ້ສູນຫາຍອີກຫຼາຍສິບຄົນ ຂະນະທີ່ລັດໂຣດໄອແລນກໍປະສົບກັບປັນຫາໄຟຟ້າດັບ ເຮັດໃຫ້ປະຊາຊົນ 100,000 ກວ່າຄົວເຮືອນບໍ່ມີໄຟຟ້າໃຊ້ ແລະ ເສັ້ນທາງຫຼາຍສາຍກໍຖືກຕັດຂາດ.

ປະທານາທິບໍດີ ໂຈ ໄບເດນ ໄດ້ຖະແຫຼງການວ່າ ທາງລັດຖະບານກາງຈະຮີບຮ້ອນໃຫ້ຄວາມຊ່ວຍເຫຼືອປະຊາຊົນທີ່ໄດ້ຮັບຜົນກະທົບໂດຍໄວ ພ້ອມປະກາດພາວະໄພພິບັດສຸກເສີນ ຕາມດ້ວຍແຜນຟື້ນຟູຄວາມເສຍຫາຍຈາກໄພທຳມະຊາດຄັ້ງນີ້.

ສູນເຮີຣີເຄນແຫ່ງຊາດສະຫະລັດລາຍງານເມື່ອວັນທີ 22 ສິງຫາວ່າ ພະຍຸເຮີຣິເຄນເຮັນຣີໄດ້ອ່ອນກຳລັງລົງເປັນພະຍຸໂຊນຮ້ອນ ຂະນະພັດເຂົ້າເມືອງເວສຕໍລີຂອງລັດໂຣດໄອແລນ ດ້ວຍຄວາມໄວລົມ 96 ກິໂລແມັດຕໍ່ຊົ່ວໂມງ, ຂະນະທີ່ປັດຈຸບັນພະຍຸໂຊນຮ້ອນເຮັນຣີ ເຄື່ອນຕົວດ້ວຍຄວາມໄວລົມ 64 ກິໂລແມັດຕໍ່ຊົ່ວໂມງຂະນະພັດຜ່ານລັດຄອນເນດທິຄັດ.