Fox News ລາຍງານ: ແກຣີ ວູບເກີ ໄວ 37 ປີ, ແບຣດ ວູບເກີ ໄວ 35 ປີ ແລະ ທອດດ໌ ວູບເກີ ໄວ 31 ປີ ສາມອ້າຍນ້ອງຈາກລັດໂອໄຮໂອ, ສະຫະລັດອາເມລິກາ ພົບເປັນສົບພາຍຫຼັງຕິດຄ້າງຢູ່ໃນຫຼຸມຝຸ່ນຄອກ ໃນຟາມຂອງພວກເຂົາ ໃນຊ່ວງກຳລັງພະຍາຍາມສ້ອມແປງປໍ້າລະລາຍຝຸ່ນ.

ເຈົ້າໜ້າທີ່ລາຍງານວ່າ ຜູ້ເຄາະຮ້າຍສາມລາຍໄດ້ຊ່ວຍກັນສ້ອມແປງປໍ້າລະລາຍຝຸ່ນທີ່ຢູ່ພື້ນຫຼຸມ ແຕ່ບໍ່ສາມາດຂຶ້ນມາຈາກຫຼຸມຝຸ່ນຄອກໄດ້ ແຕ່ເນື່ອງຈາກໃນຫຼຸມດັ່ງກ່າວມີອາຍພິດອັນຕະລາຍບາງຊະນິດ ເຊັ່ນ ໄຮໂດຣເຈນຊັນໄຟ, ມີເທນ, ຄາບອນມໍນອກໄຊດ໌ ແລະ ແອມໂມເນຍ ເຊິ່ງເປັນສານອັນຕະລາຍຕໍ່ລະບົບຫັນໃຈອັນເປັນສາເຫດເຮັດໃຫ້ສາມອ້າຍນ້ອງເສຍຊີວິດ.

ຫຼຸມຝຸ່ນຄອກເປັນເລື່ອງປົກກະຕິທີ່ສ້າງຂຶ້ນຢູ່ໃນຟາມລ້ຽງສັດຂະໜາດໃຫຍ່ ແລະ ນຳໃຊ້ເພື່ອກັກເກັບສິ່ງເສດເຫຼືອຕ່າງໆ ກ່ອນຈະກາຍເປັນຝຸ່ນສຳລັບນາເຂົ້າ ຫຼື ເຄື່ອງປູກອື່ນໆ ແຕ່ຫຼຸມດັ່ງກ່າວສາມາດຜະລິດອາຍພິດທີ່ເປັນອັນຕະລາຍຕໍ່ຮ່າງກາຍຂອງມະນຸດໄດ້ເຊັ່ນກັນ.