ປັດຈຸບັນຖືເປັນຍຸກແຫ່ງການທຳລາຍລ້າງຂອງພະຍາດລະບາດທີ່ເກີດຂຶ້ນໃນຮອບໜຶ່ງສັດຕະວັດ ເຊິ່ງຫຼາຍຄົນຮູ້ຈັກກັນນັ້ນກໍຄື ໂຄໂຣນ່າໄວຣັສສາຍພັນໃໝ່ ຫຼື ໂຄວິດ-19, ເຮັດໃຫ້ຫຼາຍຄົນມີສະຕິໃນການການປ້ອງກັນຕົນເອງດ້ວຍການໃຊ້ຜ້າປິດປາກ-ດັງ ຈົນບາງຄັ້ງຫຼາຍຄົນກໍລືມຄຳນຶງເລື່ອງຄວາມປອດໄພທາງຖະໜົນ ໂດຍສະເພາະການຂັບຂີ່ລົດຈັກໂດຍບໍ່ໃຊ້ໝວກກັນກະທົບ.

ການປ້ອງກັນຕົນເອງຂັ້ນຕົ້ນຈາກພະຍາດໂຄວິດກໍຄືການໃຊ້ຜ້າປິດປາກ-ດັງ, ສ່ວນການປ້ອງກັນຕົນເອງຈາກການເກີດອຸບັດເຫດ ຫຼື ບໍ່ໃຫ້ເກີດກໍລະນີຮ້າຍແຮງຈົນເຖິງຂັ້ນເສຍຊີວິດເມື່ອເກີດອຸບັດເຫດສຳລັບນັກຂັບຂີ່ລົດຈັກ ກໍຄົງໜີບໍ່ມົ້ມ “ໝວກກັນກະທົບ”.

“ໝວກກັນກະທົບ” ຫຼື “ໝວກກັນນັອກ” ມີໄວ້ສວມໃສ່ເທິງຫົວໃນຂະນະຂັບ ຫຼື ຂີ່ລົດຈັກ ເຊິ່ງມີທັງສຳລັບເດັກນ້ອຍ ແລະ ຜູ້ໃຫຍ່, ໝວກກັນນັອກມີຄວາມສຳຄັນໃນການປ້ອງກັນຄວາມປອດໄພໃນການຂັບຂີ່ລົດຈັກ ເນື່ອງຈາກການໃສ່ໝວກກັນນັອກສາມາດລົດຄວາມສ່ຽງຕໍ່ການບາດເຈັບຮຸນແຮງບໍລິເວນຫົວ ຫຼື ເສຍຊີວິດຈາກແຮງກະທົບຂອງອຸບັດເຫດ.

ນອກຈາກໝວກກັນກະທົບແລ້ວກໍມີ “ສະຕິ” ໃນການຂັບຂີ່ ບໍ່ວ່າຈະເປັນລົດຈັກ ຫຼື ລົດໃຫຍ່, ບໍ່ດື່ມສິ່ງມຶນເມົາແລ້ວຂັບລົດ ເພາະຫາກເກີດອຸບັດເຫດຂຶ້ນມາ ຍ່ອມມີຄຳວ່າ “ສູນເສຍ” ເກີດຂຶ້ນພ້ອມໆກັນ ດັ່ງທີ່ເຫັນໃນກໍລະນີອາທິດຜ່ານມາ ພຽງຄືນດຽວມີລາຍງານການເສຍຊີວິດຈາກອຸບັດເຫດແບບບໍ່ເປັນທາງການໃນນະຄອນຫຼວງວຽງຈັນ 4 ຄົນ ຖືເປັນການສູນເສຍທີ່ສຳຄັນ, ຮ້າຍແຮງກວ່າພະຍາດອັນຕະລາຍທີ່ກຳລັງລະບາດໃນປັດຈຸບັນ.

ແມ່ນໃຜມີໜ້າທີ່ຫຼຸດຜ່ອນປັນຫາອຸບັດເຫດເທິງຖະໜົນ? ຈະໄປອາໄສພຽງເຈົ້າໜ້າທີ່ຕຳຫຼວດຈະລາຈອນຍ່ອມເປັນໄປບໍ່ໄດ້ ຫາກພວກເຮົາທຸກຄົນບໍ່ຮ່ວມແຮງຮ່ວມໃຈກັນ, ມີສະຕິທຸກຄັ້ງໃນເວລາຂັບຂີ່, ໃສ່ໝວກກັນນັອກທຸກຄັ້ງເວລາຂັບຂີ່ລົດຈັກ, ໃຫ້ກຽດກັນບໍ່ວ່າຈະເປັນລົດໃຫຍ່ລາຄາແພງ ຫຼື ລົດຮ້າງໆລາຄາຖືກ ເພາະທຸກຊີວິດແມ່ນມີຄ່າເທົ່າກັນ.