ສຳນັກຂ່າວ Reuters ລາຍງານວ່າ: ນິວຊີແລນ (New Zealand) ວາງແຜນຈະອະນຸຍາດໃຫ້ນັກທ່ອງທ່ຽວຜູ້ທີ່ໄດ້ຮັບວັກຊີນປ້ອງກັນໂຄວິດ-19 ຈາກປະເທດທີ່ມີການລະບາດຕໍ່າ ສາມາດເດີນທາງເຂົ້າປະເທດໄດ້ປັດສະຈາກການກັກໂຕ, ເຊິ່ງແຜນການດັ່ງກ່າວ ຄາດວ່າຈະເລີ່ມປະຕິບັດຢ່າງເປັນຮູບປະທຳໃນຕົ້ນປີໜ້າ.
ທ່ານ ນາງ ຈາຊິນດາ ອາຣ໌ເດີນ (Jacinda Ardern), ນາຍົກລັດຖະມົນຕີນິວຊີແລນ ກ່າວວ່າ: ນັກທ່ອງທ່ຽວຜູ້ສັກວັກຊີນຄົບທີ່ເດີນທາງຈາກປະເທດທີ່ມີການລະບາດຂອງໂຄວິດ-19 ຂ້ອນຂ້າງຕໍ່າ ແມ່ນຈະບໍ່ມີການກັກໂຕແຕ່ຢ່າງໃດ, ສ່ວນນັກເດີນທາງຈາກປະເທດທີ່ມີຄວາມສ່ຽງລະດັບປານກາງຫາສູງ ຈະຕ້ອງປະຕິບັດຕາມມາດຕະການປ້ອງກັນໂຄວິດທີ່ຄະນະສະເພາະກິດນູແວນເຊລັງວາງອອກ ໂດຍສະເພາະຕ້ອງໄດ້ກັກໂຕຄົບ 14 ວັນດພື່ອຕິດຕາມອາການ.
“ພວກເຮົາຍັງບໍ່ທັນເວົ້າໄດ້ວ່າຈະເປີດປະເທດໃໝ່ໄດ້ເຕັມຮ້ອຍ ເນື່ອງຈາກຈະຕ້ອງໄດ້ເພີ່ມທະວີການເຝົ້າລະວັງ ພ້ອມທັງກວດກາຕິດຕາມການເດີນທາງຂອງນັກທ່ອງທ່ຽວໃຫ້ລະອຽດຮອບຄອບ ເພື່ອຫຼີກລ່ຽງໄພອັນຕະລາຍທີ່ອາດຈະເກີດຂຶ້ນຕໍ່ປະເທດ ກໍຄືພົນລະເມືອງຂອງພວກເຮົາ.” ທ່ານ ນາງ ອາຣ໌ເດີນ ກ່າວ.
ຢ່າງໃດກໍຕາມ, ທ່ານນາຍົກຍິງຄົນນີ້ກໍໄດ້ຮັບການຍົກຍ້ອງຈາກທົ່ວໂລກໃນດ້ານການຄວບຄຸມການແຜ່ລະບາດຂອງໂຄວິດ-19 ພາຍໃນປະເທດນູແວນເຊລັງ ຜ່ານການຈັດຕັ້ງປະຕິບັດມາດຕະການສະກັດກັ້ນທີ່ເຂັ້ມງວດ ຂະນະທີ່ປະເທດດັ່ງກ່າວມີລາຍງານຜູ້ຕິດເຊື້ອໂຄວິດພຽງ 2.500 ຄົນ, ມີຜູ້ເສຍຊີວິດ 26 ຄົນເທົ່ານັ້ນ.