ໃນວັນທີ 7 ສິງຫາ 2021 ເວັບໄຊ້ Thairath ໄດ້ລາຍງານວ່າ: ເຈົ້າໜ້າທີ່ຂອງສະຫະລັດອາເມລິກາສາມາດຈັບກຸມຊາຍຊາວມຽນມາ 2 ຄົນ ໄດ້ທີ່ນະຄອນນິວຢອກ ປະເທດອາເມລິກາ ໃນຂໍ້ຫາເປັນຜູ້ຕ້ອງສົງໄສທີ່ກໍາລັງວາງແຜນກັບນາຍໜ້າຄ້າອາວຸດໃນປະເທດໄທທີ່ຂາຍອາວຸດໃຫ້ກັບກອງທັບມຽນມາ ເພື່ອຄາດຕະກໍາ ຫຼື ທໍາຮ້າຍຮ່າງກາຍທ່ານ ຈໍໂມ ຕຸນ ເອກອັກຄະລັກສະທູດມຽນມາທີ່ປະຈໍາຢູ່ອົງການສະຫະປະຊາຊາດ ທີ່ເຄີຍຍົກ 3 ນິ້ວໃນການຕໍ່ຕ້ານລັດຖະບານທະຫານຂອງມຽນມາ.
ທ່ານຈໍ ໂມຕຸນ ເອກອັກຄະລັກສະທູດມຽນມາ ໃນຖານະທີ່ເປັນຕົວແທນຂອງລັດຖະບານທີ່ປະຈໍາຢູ່ອົງການສະຫະປະຊາດໄດ້ເປີດຜີຍວ່າ ຖືກຂູ່ທໍາຮ້າຍຮ່າງກາຍຈຶ່ງໄດ້ແຈ້ງເລື່ອງນີ້ໃຫ້ແກ່ທາງສະຫະລັດຮັບຮູ້ ແລະ ເຮັດໃຫ້ເຈົ້າໜ້າທີ່ຂອງສະຫະລັດໄດ້ເພີ່ມມາດຕະການຮັກສາຄວາມປອດໄພໃຫ້ແກ່ທູດມຽນມາຫຼາຍຂຶ້ນ.
ສ່ວນທາງດ້ານໄອຍະການເຂດນະຄອນນິວຢອກໃຕ້ໄດ້ອອກຖະແຫຼງການໃນວັນສຸກທີ່ຜ່ານມາວ່າ ຜູ້ຕ້ອງຫາສອງຄົນຊາວມຽນມາ ໄດ້ແກ່: ທ້າວ ປຽວ ຮຽນຮັດ ອາຍຸ 28 ປີ ແລະ ທ້າວ ຍີ ຮຽນຊໍ ອາຍຸ 20 ປີ ໄດ້ຖືກຕັ້ງຂໍ້ຫາສົມຮູ້ຮ່ວມຄິດກັນທໍາຮ້າຍຮ່າງກາຍ ແລະ ກໍເຫດຮຸນແຮງຕໍ່ກັບເຈົ້າໜ້າທີ່ຕ່າງຊາດເຊິ່ງມີໂທດຕິດຄຸກ 5 ປີ.
ຈາກການສອບສວນຂອງເຈົ້າໜ້າທີ່ຜູ້ຕ້ອງຫາທັງສອງຄົນແມ່ນຖືກວ່າຈ້າງຈາກນາຍໜ້າຄ້າອາວຸດຄົນໜຶ່ງໃນປະເທດໄທເພື່ອໃຫ້ໄປທໍາຮ້າຍຮ່າງກາຍ ຫຼື ຄາດຕະກໍາທ່ານ ຈໍ ໂມຕຸນ ແລະ ບັງຄັບໃຫ້ລາອອກຈາຕໍາແໜ່ງ ແລະ ຖ້າຫາກບໍ່ຍອມລາອອກແມ່ນຈະຖືກຄາດຕະກໍາໃນທັນທີ.
ເຖິງຢ່າງໃດກໍຕາມ ທ່ານ ຈໍ ໂມຕຸນ ເອກອັກຄະລັກສະທູດມຽນມາປະຈໍາສະຫະປະຊາຊາດ ເຖິງແມ່ນວ່າຈະຖືກລັດຖະບານທະຫານມຽນມາປົດອອກຈາກຕໍາແໜ່ງທູດມຽນມາປະຈໍາ UN ກໍຕາມ ແຕ່ທ່ານ ຈໍ ໂມຕຸນ ກໍຍັງດໍາລົງຕໍາແໜ່ງຢູ່ຄືເກົ່າ ເນື່ອງຈາກສະຫະປະຊາຊາດບໍ່ຮອງຮັບລັດຖະບານມຽນມາທີ່ມາຈາກການຍຶດອໍານາດ.