ວັນທີ 6 ສິງຫາ 2021 ສໍານັກຂ່າວ ໄທຣັດ ລາຍງານວ່າ ຈີນຄັດຄ້ານການຂາຍອາວຸດຄັ້ງນີ້ ແລະ ສະແດງຄວາມບໍ່ພໍໃຈຢ່າງເປັນທາງການ ເຖິງອາເມລິກາ ໂດຍກະຊວງຕ່າງປະເທດຈີນ ລະບຸ ແລະ ເສີມວ່າ ຈີນຈະໃຊ້ມາດຕະການຕອບໂຕ້ເພື່ອປົກປ້ອງຜົນປະໂຫຍດຕາມກົດໝາຍຂອງປະເທດ.

ການຂາຍອາວຸດດັ່ງກ່າວ ຖືເປັນການຂາຍອາວຸດຄັ້ງທໍາອິດ ໃຫ້ແກ່ໄຕ້ຫວັນ ຂອງອາເມລິກາ ໃນຍຸກການປົກຄອງຂອງປະທານາທິບໍດີ ໂຈ ໄບເດັນ ເຊິ່ງປະກອບດ້ວຍ ປືນໃຫຍ່ຈໍານວນໜຶ່ງ, ຍານພາຫະນະຫຸ້ມເກາະ ແລະ ຊຸດອຸປະກອນທີ່ສາມາດປ່ຽນລູູກປືນພິເສດ ເກືອບ 1,700 ຊຸດ.

ກະຊວງການຕ່າງປະເທດຂອງອາເມລິກາ ລະບຸວ່າ ການຂາຍອາວຸດຄັ້ງນີ້ ຈະຊ່ວຍເຮັດໃຫ້ກອງປືນໃຫຍ່ຂອງໄຕ້ຫວັນ ມີຄວາມທັນສະໄໝ, ເສີມສ້າງຄວາມເຂັ້ມແຂງໃນກາງປ້ອງກັນຕົນເອງ ໃຫ້ສອດຄ່ອງກັບໄພຄຸກຄາມ ໃນປັດຈຸບັນ ແລະ ອະນາຄົດ.

ຢ່າງໃດກໍຕາມ, ການຂາຍອາວຸດຄັ້ງນີ້ ຍັງຕ້ອງລໍຖ້າການອະນຸມັດຈາກທາງສະພາກ່ອນ ແຕ່ຄາດວ່າຈະຜ່ານອະນຸມັດໄດ້ຢ່າງບໍ່ມີບັນຫາ ເນື່ອງຈາກ 2 ພັກໃຫຍ່ ຂອງອາເມລິກາ ມີຄວາມຄິດເຫັນກົງກັນ ໃນເລື່ອງຂອງການສະໜັບສະໜຸນໄຕ້ຫວັນ. ຫຼັງຈາກໄດ້ຮັບການອະນຸມັດແລ້ວ ຂໍ້ສະເໜີຈະຖືກນໍາໄປເຈລະຈາຫາລືຂັ້ນສຸດທ້າຍ ລະຫວ່າງ ໄຕ້ຫວັນ ແລະ ບໍລິສັດ ບີເອອີ ຊິສເຕັມ ບໍລິສັດຜະລິດອາວຸດສັນຊາດອັງກິດ ແລະ ເປັນຜູ້ຈັດຫາປືນໃຫ້ອະເມລິກາ.