ວັນທີ 3 ສິງຫາ 2021 ສໍານັກຂ່າວ BBC news ໄດ້ລາຍງານວ່າ ເຈົ້າໜ້າທີ່ທາງການໃນເມືອງອູ່ຮັ່ນຂອງຈີນ ຈະເລີ່ມກວດຫາເຊື້ອພະຍາດໂຄວິດ-19 ກັບປະຊາກອນທົ່ວເມືອງ ຫຼັງຈາກມີການກວດພົບເຊື້ອໃນກຸ່ມຄົນຈໍານວນໜຶ່ງ ໂດຍການລະບາດຄັ້ງໃໝ່ຂອງເຊື້ອໂຄວິດ-19 ໃນຈີນ ຍັງໄດ້ລຸກລາມຂະຫຍາຍວົງກວ້າງອອກໄປອີກຫຼາຍເຂດທາງຕາເວັນອອກຂອງປະເທດ.
ຈີນກໍາລັງພົບການລະບາດຄັ້ງໃຫຍ່ທີ່ສຸດອີກຄັ້ງໜຶ່ງ ໃນຮອບຫຼາຍເດືອນທີ່ຜ່ານມາ ໂດຍໃນຊ່ວງ 10 ມື້ທີ່ຜ່ານມາ ມີລາຍງານຜູ້ຕິດເຊື້ອໂຄວິດ-19 ສາຍພັນເດວຕ້າ ທີ່ໄດ້ຮັບການຢືນຢັນແລ້ວກວ່າ 300 ລາຍ ໃນ 15 ພື້ນທີ່ ແລະ ຍັງໄດ້ລຸກລາມຂະຫຍາຍວົງກວ້າງອອກໄປອີກ ໃນຫຼາຍພື້ນທີ່ທາງພາກຕາເວັນອອກຂອງປະເທດ.
ຂະນະທີ່ຈີນ ໄດ້ລາຍງານຈໍານວນຜູ້ຕິດເຊື້ອລາຍໃໝ່່ ຈໍານວນ 90 ຄົນ, ຄະນະກໍາມະການສຸຂະພາບແຫ່ງຊາດ ລະບຸວ່າ ໃນຈໍານວນທັງໝົດນີ້ ມີ 61 ຄົນ ທີ່ຕິດເຊື້ອຈາກຄົນໃນພື້ນທີ່ ເຊິ່ງກ່ອນໜ້ານີ້ແມ່ນ ກວດພົບຜູ້ຕິດເຊື້ອ 55 ຄົນ.
ທີ່ຜ່ານມາ ຈີນປະສົບຄວາມສໍາເລັດຢ່າງສູງ ໃນການຄວບຄຸມໂຄວິດ-19 ໃນປະເທດ ແຕ່ການແຜ່ລະບາດໃນຮອບໃໝ່ນີ້ ເຊິ່ງເປັນການກວດພົບຄັ້ງທໍາອິດໃນພະນັກງານຢູ່ທີ່ສະໜາມບິນ ທີ່ເມືອງນານກິງ ເຮັດໃຫ້ເກີດຄວາມກັງວົນເພີ່ມຂຶ້ນ, ທາງການຍັງສັ່ງປິດສະຖານທີ່ທ່ອງທ່ຽວອື່ນໆ ໃນເມືອງຈາງເຈຍເຈ້ຍ ທັງໝົດ, ສ່ວນບັນດານັກທ່ອງທ່ຽວຈາກຕ່າງພື້ນທີ່ ກໍຕ້ອງຜ່ານການກວດຫາເຊື້ອພະຍາດໂຄວິດ-19 ກ່ອນ ຈຶ່ງສາມາດເດີນທາງກັບເມືອງຂອງຕົນເອງໄດ້.
ນອກຈາກນີ້, ເຊື້ອໂຄວິດ-19 ສາຍພັນເດວຕ້າ ຍັງແຜ່ກະຈາຍໄປເຖິງໃນເມືອງປັກກິ່ງນໍາອີກ ໂດຍມີລາຍງານການຕິດເຊື້ອຂອງພະຍາດພາຍໃນທ້ອງຖິ່ນຫຼາຍກໍລະນີແລ້ວ ເຮັດໃຫ້ເຈົ້າໜ້າທີ່ຕ້ອງສັ່ງປິດການເດີນທາງ ທັງເທິງບົກ ແລະ ທາງອາກາດ ລະຫວ່າງເມືອງປັກກິ່ງ ໄປຫາເມືອງທີ່ມີຜູ້ຕິດເຊື້ອ ລວມທັງຫ້າມນັກທ່ອງທ່ຽວທຸກຄົນເດີນທາງເຂົ້ານະຄອນຫຼວງຂອງຈີນ ນອກຈາກຜູ້ທີ່ມີເຫດຈໍາເປັນ ເຊິ່ງມີຜົນກວດເປັນລົບເທົ່ານັ້ນທີ່ສາມາດເດີນທາງໄດ້.