ເວັບໄຊ້ຂ່າວ Posttoday ໄດ້ລາຍງານວ່າ: ໃນວັນທີ 27 ກໍລະກົດ 2021 ພັນເອກ ມຽວ ມິນ ນອງ (Myo Min Naung) ໄດ້ຍອມຮັບວ່າໄດ້ສັ່ງໃຫ້ທະຫານເຂົ້າຍຶດຖັງອົກຊີຈໍານວນ 100 ຖັງທີ່ອົງກອນການກຸສົນເມືອງຢ່າງກຸ້ງ ທີ່ນໍາເຂົ້າມາຈາກປະເທດໄທເພື່ອປິ່ນປົວຜູ້ຕິດເຊື້ອໂຄວິດ-19 ໂດຍຖັງອົກຊີດັ່ງກ່າວຖືກນໍາເຂົ້າຜ່ານທາງຂົວມິດຕະພາບໄທ-ມຽນມາ ໃນເມືອງມຽວດີ ໃນວັນເສົາທີ 24 ກໍລະກົດ 2021 ທີ່ຜ່ານມາ.

ແຕ່ຕໍ່ມາ ພັນເອກ ມຽວ ມິນ ນອງ ກໍໄດ້ກ່າວຕໍ່ກັບໜັງສືພິມຂອງລັດຖະບານມຽນມາ ໂດຍໃຫ້ການປະຕິເສດວ່າບໍ່ໄດ້ຍຶດເອົາຖັງອົກຊີ ພຽງແຕ່ຢືມໄປໃຊ້ໃນໂຮງໝໍ ແລະ ສູນປິ່ນປົວຜູ້ຕິດເຊື້ອໂຄວິດ-19 ທີ່ມີຄວາມຕ້ອງການໃຊ້ອົກຊີຢ່າງເລັ່ງດ່ວນເທົ່ານັ້ນ.

ເຖິງຢ່າງໃດກໍຕາມປະຊາຊົນເຊື່ອວ່າເປັນພຽງຂໍ້ອ້າງໃນການປະຕິເສດເທົ່ານັ້ນ ໃນຂະນະທີ່ປະຊາຊົນຜູ້ພົບເຫັນເຫດການໄດ້ບອກວ່າກອງກໍາລັງຂອງລັດຖະບານມີການຄຸກຄາມ ແລະ ຂົ່ມຂູ່ດ້ວຍອາວຸດໃນຂະນະທີ່ນໍາຖັງອົກຊີອອກໄປ ແລະ ໃນຕອນຄໍ່າຂອງວັນທີ 24 ກໍລະກົດ 2021 ກອງກໍາລັງທະຫານຂອງມຽນມາກໍໄດ້ມອບເງິນຈໍານວນ 272.000.000 ກີບ ໃຫ້ແກ່ຜູ້ນໍາເຂົ້າຖັງອົກຊີເພື່ອຮັບປະກັນວ່າຈະມີການສົ່ງຖັງອົກຊີຄືນ ແຕ່ຈົນເຖິງຕອນນີ້ຜູ້ນໍາເຂົ້າຖັງອົກຊີກໍຍັງບໍ່ໄດ້ຮັບເງິນຈໍານວນດັ່ງກ່າວ.