ການຕັດສິນໃຈໃຊ້ງົບປະມານມະຫາສານ ເພື່ອພັດທະນາເນື້ອທີ່ເຂດໜອງແປນ ເມືອງຫາດຊາຍຟອງ ນະຄອນຫຼວງ
ວຽງຈັນ ໃຫ້ເປັນແຫຼ່ງທ່ອງທ່ຽວຄົບວົງຈອນຂອງອາຊຽນ ໂດຍແມ່ນບໍລິສັດ ການຄ້າສາກົນລາວເອເຊຍ ຈຳກັດຜູ້ດຽວ
ເປັນຜູ້ສຳປະທານ ໄດ້ເລີ່ມກະກຽມຈັດຕັ້ງປະຕິບັດ ພາຍຫຼັງທີ່ບໍລິສັດດັ່ງກ່າວ ໄດ້ຮ່ວມກັບບໍລິສັດ ເຊຊວນຊາງໄທວິສະ
ວະກຳກໍ່ສ້າງ ຈຳກັດ ສປ ຈີນ ນຳເອົາກົນຈັກເຂົ້າມາເຖິງສະຖານທີ່ໂຄງການ ເພື່ອກະກຽມຄວາມພ້ອມໃນການລົງມືກໍ່
ສ້າງໂຄງການໃນໄວໆນີ້.
ທ່ານ ທະນະກິດ ສຸວັນນະວົງ ຜູ້ອຳນວຍການໃຫຍ່ບໍລິສັດ ການຄ້າສາກົນລາວເອເຊຍ ຈຳກັດຜູ້ດຽວ ໄດ້ກ່າວວ່າ: ໂຄງ
ການໜອງແປນ ມີເນື້ອທີ່ 150 ເຮັກຕາ ໄລຍະສຳປະທານ 70 ປີ ແລະ ສາມາດຕໍ່ໄດ້ ຈະສ້າງໃຫ້ເປັນແຫຼ່ງທ່ອງທ່ຽວທີ່
ໃຫຍ່ ແລະ ຄົບວົງຈອນລະດັບອາຊຽນ ເພື່ອຮອງຮັບການກ້າວເຂົ້າສູ່ປະຊາຄົມເສດຖະກິດອາຊຽນ (AEC) ປີ 2015 ກໍ່
ຄືກິດຈະການການທ່ອງທ່ຽວເຊື່ອມໂຍງກັບບັນດາປະເທດໃນພາກພື້ນ ໃນນີ້ ປະກອບມີໂຮງແຮມລະດັບ 5 ດາວ ສະ
ໜາມກ໊ອບ ທະເລຈຳລອງ ສູນການຄ້າສາກົນ ສວນສະໜຸກ ກຸ່ມເຮືອນຂອງແຕ່ລະປະເທດໃນອາຊຽນ ແຫຼ່ງບັນເທີງ
ແລະ ກິດຈະການການທ່ອງທ່ຽວແບບຄົບວົງຈອນ ຈະໃຊ້ງົບເຂົ້າໃນການກໍ່ສ້າງ 3 ຕື້ໂດລາສະຫະລັດ ຫຼື ປະມານ
24.000 ຕື້ກີບ ໃຊ້ເວລາການກໍ່ສ້າງ 6 ປີ ນັບແຕ່ທ້າຍປີ 2014 ຫາປີ 2020.
ໄລຍະຜ່ານມາ ຜູ້ສຳປະທານ ໄດ້ສຳເລັດການສຳຫຼວດ-ອອກແບບແຕ່ລະກິດຈະການ ແລະ ໄດ້ຜ່ານຂະແໜງສິ່ງແວດ
ລ້ອມແລ້ວ ປັດຈຸບັນແມ່ນກຳລັງສຸມໃສ່ຂຸດລອກພື້ນທີ່ອະນາໄມໜອງ ບຳບັດນ້ຳ ປັບໜ້າດິນໃຫ້ໄດ້ຕາມແບບຂອງ
ໂຄງການ ເພື່ອກຽມກໍ່ສ້າງໃນໄວໆນີ້ ໂດຍເບື້ອງຕົ້ນ ຈະພັດທະນາເນື້ອທີ່ 73 ເຮັກຕາ ໃຊ້ເວລາ 36 ເດືອນ ຈາກນັ້ນຈະ
ເລີ່ມກໍ່ສ້າງສວນສະໜຸກ ທະເລນ້ຳຈືດຈຳລອງ ຄວບຄູ່ກັບການກໍ່ສ້າງສູນພັດທະນາອາຊຽນ ສູນວັດທະນະທຳອາຊຽນ
ແລະ ອື່ນໆ ພາຍຫຼັງໂຄງການນີ້ສຳເລັດ ຈະສາມາດນຳເງິນເຂົ້າມາປະເທດເຮົາໄດ້ຢ່າງມະຫາສານ ແລະ ຈະປະກອບ
ສ່ວນພັດທະນາເສດຖະກິດ-ສັງຄົມ ສ້າງວຽກເຮັດງານທຳ ແລະ ຫຼຸດຜ່ອນຄວາມທຸກຍາກຂອງປະຊາຊົນເທື່ອລະກ້າວ.
ແຫລ່ງຂ່າວ: ວຽງຈັນໃໝ່