ວັນທີ 27 ກໍລະກົດ 2021 ເວັບໄຊ້ CNN ລາຍງານວ່າ ເສືອດາວຫິມະໂຕໜຶ່ງ ຢູ່ໃນສວນສັດ ນະຄອນດິເອໂກ ລັດແຄລິຟໍເນຍ ສະຫະລັດອາເມລິກາ ຕິດເຊື້ອໄວຣັສ ໂຄວິດ-19 ຫຼັງຈາກມີອາການໄອ ແລະ ຂີ້ມູກໄຫຼ ຕັ້ງແຕ່ອາທິດທີ່ຜ່ານມາ, ໂດຍສັດຕະວະແພດຜູ້ຊຽວຊານດ້ານການດູແລສັດປ່າຂອງສວນສັດດັ່ງກ່າວ ເປີດເຜີຍວ່າ ຜົນການກວດເບື້ອງຕົ້ນເຫັນວ່າ ເສືອດາວຫິມະໂຕນີ້ ມີເຊື້ອພະຍາດໂຄວິດ-19 ໂດຍທີ່ມັນຍັງບໍ່ເຄີຍໄດ້ຮັບການສັກວັກຊີນຕ້ານໂຄວິດ-19 ມາກ່ອນ ແລະ ຍັງບໍ່ຮູ້ສາເຫດເທື່ອວ່າໄດ້ຮັບເຊື້ອມາຈາກໃສ.

ທາງດ້ານກອງທຶນເສືອດາວຫິມະ ເປີດເຜີຍວ່າ ເສືອດາວຫິມະເປັນສັດຫາຍາກ ໂດຍປັດຈຸບັນທົ່ວໂລກມີເຫຼືອຢູ່ພຽງແຕ່ 4,000 – 6,000 ໂຕເທົ່ານັ້ນ, ເມື່ອຕົ້ນເດືອນ ມັງກອນ ທີ່ຜ່ານມາ ທາງສວນສັດດັ່ງກ່າວ ໄດ້ເລີ່ມໂຄງການສັກວັກຊີນໂຄວິດ-19 ສໍາລັບສັດ ໂດຍສະເພາະໃຫ້ກັບບັນດາສັດໃນສວນສັດ ຫຼັງຈາກພົບລິງກໍລິລາ ຕິດເຊື້ອພະຍາດໂຄວິດ-19, ໂດຍປັດຈຸບັນ ລິງດັ່ງກ່າວໄດ້ຫາຍດີແລ້ວ ແລະ ທາງສວນສັດລະບຸວ່າ ຈະດໍາເນີນການສັກວັກຊີນໃຫ້ກັບສັດຕໍ່ໄປ ໂດຍຈະເນັ້ນທີ່ສັດກຸ່ມສ່ຽງຕໍ່ໄປເຊັ່ນ ເສືອດາວ, ສິງ, ເສືອຊີຕ້າ, ເສືອຈາກົ້ວ ແລະ ສິງໂຕພູເຂົາ.