ອີງຕາມສໍານັກຂ່າວ news1 ໄດ້ລາຍງານວ່າ: ທ່ານ Mansukh Mandaviya ລັດຖະມົນຕີສາທາລະນະສຸກຂອງອິນເດຍໄດ້ກ່າວຜ່ານຖະແຫຼງການວ່າ ອິນເດຍມີຈໍານວນຜູ້ຕິດເຊື້ອດ້ວຍໂຣກເຊື້ອລາດໍາ 45.374 ຄົນ ແລະ ໂຣກນີ້ມີຊື່ຢ່າງເປັນທາງການກໍຄື ໂຣກເຊື້ອລາດໍາມິວຄໍໄມຊິສ (mucormycosis) ທີ່ພາກຊີວິດຄົນອິນເດຍໄປແລ້ວຫຼາຍກວ່າ 4.300 ຄົນ.

ນອກຈາກນີ້ຍັງພົບວ່າເກືອບທັງໝົດທີ່ຍັງປິ່ນປົວໃນໂຮງໝໍແມ່ນຕິດເຊື້ອຮຸນແຮງທີ່ດັງ, ຕາ ແລະ ບາງສ່ວນຂອງສະໝອງ ແລະ ຍັງພົບວ່າໂຣກເຊື້ອລາດໍາສ່ວນໃຫຍ່ລະບາດຢູ່ໃນກຸ່ມຜູ້ຕິດເຊື້ອໂຄວິດ-19 ທີ່ກໍາລັງປິ່ນປົວ ໂດຍທາງແພດໄດ້ລະບຸວ່າເຊື້ອລາດໍານີ້ມີຄວາມເຊື່ອມໂຍງກັບຢາທີ່ໃຊ້ປິ່ນປົວໂຄວິດ-19 ແລະ ເບົາຫວານ. ທາງທີມແພດໄດ້ກ່າວວ່າ: ເຊື້ອລາດໍາຈະເກີດຂຶ້ນໃນຜູ້ປ່ວຍທີ່ເຊົາຈາກໂຄວິດ-19 ທີ່ກໍາລັງພັກຟື້ນໃນຊ່ວງ 12-18 ມື້. ທັງນີ້ມີການກວດພົບວ່າຜູ້ຕິດເຊື້ອໂຣກເຊື້ອລາດໍາຈໍານວນຫຼາຍເສຍຊີວິດກ່ອນທີ່ຈະມີໂອກາດໄດ້ເຂົ້າຮັບການປິ່ນປົວໃນໂຮງໝໍ ແລະ ຈໍານວນຂອງຜູ້ທີ່ເຂົ້າຮັບການປິ່ນປົວ ແລະ ຜູ້ທີ່ປິ່ນປົວຈົນຫາຍດີນັ້ນກໍໄດ້ຮັບຜົນກະທົບທາງດ້ານສຸຂະພາບ.