ສຳນັກຂ່າວ Aljazeera ລາຍງາຍວ່າ: ທ່ານ ມຸນ ແຈອິນ, ປະທານາທິບໍດີເກົາຫຼີໃຕ້ ຕັດສິນໃຈຍົກເລີກເດີນທາງຢ້ຽມຢາມຍີ່ປຸ່ນເພື່ອເຂົ້າຮ່ວມງານແຂ່ງຂັນກີລາໂອລິມປິກທີ່ກຸງໂຕກຽວທີ່ກຳລັງຈະເປີດສາກຂຶ້ນໃນບໍ່ຊ້ານີ້ ພ້ອມທັງຍົກເລີກແຜນກອງປະຊຸມສຸດຍອດຄັ້ງທຳອິດຂອງຕົນ ກັບທ່ານ ໂຍຊິຮິເດະ ຊູກະ, ນາຍົກລັດຖະມົນຕີແຫ່ງຍີ່ປຸ່ນ.
ການຕັດສິນໃຈຍົກເລີກຄັ້ງນີ້ ສືບເນື່ອງມາຈາກມີລາຍງານວ່າ ນັກການທູດຍີ່ປຸ່ນຄົນໜຶ່ງໄດ້ໃຊ້ພາສາລາມົກເພື່ອເຍີ້ຍຫຍັນທ່ານ ທັງທີ່ໜັງສືພິມ Yomiuri ຂອງຍີ່ປຸ່ນໄດ້ລາຍງານກ່ອນໜ້ານີ້ວ່າ ປະທານາທິບໍດີ ມຸນ ຈະມີການພົບປະກັບນາຍົກລັດຖະມົນຕີ ຊູກະ ໃນກຸງໂຕກຽວໃນວັນສຸກອາທິດນີ້, ແຕ່ລັດຖະບານທັງສອງປະເທດປະຕິເສດທັນຄວັນວ່າ ການພົບປະດັ່ງກ່າວໄດ້ສິ້ນສຸດລົງແລ້ວ.
ທາງຝ່າຍຍີ່ປຸ່ນຍັງໄດ້ວາງແຜນປ່ຽນແທນນັກການທູດຄົນໃໝ່ໃນກຸງເຊອຸນ ພາຍຫຼັງທີ່ຜູ້ກ່ຽວໄດ້ລາຍງານຄວາມຄິດເຫັນກ່ຽວກັບທ່ານມຸນ ເຊິ່ງທາງໂຄສົກລະດັບສູງຂອງລັດຖະບານຍີ່ປຸ່ນກ່າວວ່າ: ເອກອັກຄະຣາຊະທູດຍີ່ປຸ່ນໄດ້ກ່າວເຕືອນທ່ານຮອງຂອງຕົນກ່ຽວກັບຂໍ້ຄິດເຫັນທີ່ໄດ້ລາຍງານໄປແລ້ວນັ້ນ.
“ຈາກຄຳເວົ້າທີ່ບໍ່ເໝາະສົມໃນຖານະນັກການທູດ ແລະ ພວກເຮົາຮູ້ສຶກຜິດຫວັງກັບສິ່ງທີ່ເກີດຂຶ້ນ.” ທ່ານ ຄັດສຶໂນບຸ ກາໂຕະ, ຫົວໜ້າເລຂາທິການກ່າວ ແຕ່ເມື່ອຖືກຖາມກ່ຽວກັບການກະກຽມຍົກຍ້າຍນັກການທູດຄົນດັ່ງກ່າວ, ທ່ານ ກາໂຕະ ບໍ່ໄດ້ໃຫ້ລາຍລະອຽດເພີ່ມຕື່ມໃດໆ ພຽງແຕ່ກ່າວວ່າ ເປັນເລື່ອງການຕັດສິນໃຈຂອງລັດຖະມົນຕີກະຊວງການຕ່າງປະເທດ.