ສຳນັກຂ່າວ BBC ລາຍງານວ່າ: ພາກກາງຂອງຈີນ ໂດຍສະເພາະແຂວງເຫີໜານໄດ້ເກີດນໍ້າຖ້ວມຮຸນແຮງ, ເຮັດໃຫ້ປະຊາຊົນ 10,000 ກວ່າຄົນຕ້ອງໄດ້ອົບພະຍົບໄປສູ່ພື້ນທີ່ປອດໄພ ພ້ອມມີລາຍງານຜູ້ເສຍຊີວິດຢ່າງໜ້ອຍ 12 ລາຍໃນເມືອງເຈີ້ງໂຈວ.
ເນື່ອງຈາກມີຝົນຕົກໜັກຕິດຕໍ່ກັນຫຼາຍວັນຈິ່ງພາໃຫ້ເກີດນໍ້າຖ້ວມຮຸນແຮງໃນຫຼາຍພື້ນທີ່ຂອງແຂວງເຫີໜານ, ໃນນັ້ນ 12 ຕົວເມືອງໄດ້ຮັບຜົນກະທົບຍ້ອນເສັ້ນທາງຫຼາຍສາຍຖືກຕັດຂາດ ພ້ອມຫຼາຍຖ້ຽວບິນຖືກຍົກເລີກ, ຂະນະທີ່ທາງການຈີນໄດ້ຮີບຮ້ອນອົບພະຍົບປະຊາກອນຫຼາຍພັນຄົນໄປສູ່ພື້ນທີ່ປອດໄພ, ພ້ອມມີລາຍງານຜູ້ເສຍຊີວິດໃນເມືອງເຈີ້ງໂຈວ 12 ຄົນ. ນອກຈາກນີ້, ເຈົ້າໜ້າທີ່ຍັງເປີດເຜີຍວ່າ ພົບເຫັນເຂື່ອນທີ່ມີຮອຍຮົ່ວຂະໜາດ 20 ແມັດໃນເມືອງລົ່ວຫຍາງ ເຊິ່ງເກີດມີຄວາມກັງວົນວ່າ ເຂື່ອນດັ່ງກ່າວອາດມີໂອກາດຍຸບຕົວໄດ້ທຸກເມື່ອ.
ສາເຫດຂອງການເກີດນໍ້າຖ້ວມແມ່ນມີຫຼາຍປັດໄຈ ເຊິ່ງຄາດວ່າຜົນຂອງໂລກຮ້ອນທີ່ເປັນຜົນພວງມາຈາກສະພາບການປ່ຽນແປງຂອງດິນຟ້າອາກາດ ເຮັດໃຫ້ມີໂອກາດເກີດຝົນຕົກໜັກ.