ສຳນັກຂ່າວຣອຍເຕີ, ມຸມໄບ: ຂໍ້ຂັດແຍ່ງເລື່ອງຊາຍແດນລະຫວ່າງຈີນ-ອິນເດຍ ໃນເຂດພູເຂົາຫິມະໄລຢາຕາເວັນຕົກ ຍັງຄົງເປັນປັນຫາຊຳເຮື້ອທີ່ແກ້ບໍ່ໄດ້ ເຖິງແມ່ນທັງສອງຝ່າຍເຄີຍຕົກລົງເປັນເອກະພາບກັນເມື່ອປີກ່ອນກໍຕາມ.
ອີງຕາມສົນທິສັນຍາທີ່ຕົກລົງກັນໃນປີຜ່ານມາ, ຜູ້ບັນຊາການທະຫານທັງສອງຝ່າຍໄດ້ຖອນກຳລັງທະຫານ, ລວມທັງລົດຖັງ ແລະ ກອງປືນໃຫຍ່ອອກຈາກເຂດທະເລສາບປາງກົງໃນເດືອນກຸມພາ, ຖືໄດ້ວ່າ ເປັນບາດກ້າວທຳອິດຂອງການຖອນກຳລັງອອກຈາກຈຸດຂັດແຍ່ງກັນຢ່າງເຕັມຮູບແບບ. ຢ່າງໃດກໍຕາມ, ທ່ານ ເອສ ໄຊຊັນກາຣ໌, ລັດຖະມົນຕີກະຊວງການຕ່າງປະເທດຂອງອິນເດຍກ່າວວ່າ ຍັງມີຂໍ້ຂັດແຍ່ງຫຼາຍດ້ານທີ່ບໍ່ໄດ້ຮັບການແກ້ໄຂ.
ທະຫານອິນເດຍ ແລະ ຈີນເສຍຊີວິດຈາກເຫດການປະທະກັນໃນເດືອນມີນາ 2020, ຖືເປັນການສູນເສຍໃນການສູ້ຮົບກັນຄັ້ງທຳອິດຢູ່ເຂດຊາຍແດນ ໃນຮອບ 40 ກວ່າປີ ເປີດທາງໃຫ້ທະຫານຫຼາຍພັນຄົນຂອງສອງຝ່າຍປະເຊີນໜ້າກັນອີກຄັ້ງຕັ້ງແຕ່ເດືອນ ເມສາ 2020 ເຊິ່ງຫຼາຍຝ່າຍຢ້ານວ່າປັນຫາດັ່ງກ່າວອາດຈະເປັນຊະນວນພາໃຫ້ເກີດຄວາມຂັດແຍ່ງເປັນວົງກວ້າງຂອງສອງປະເທດ.
ລັດຖະມົນຕີກະຊວງການຕ່າງປະເທດຂອງຈີນ ແລະ ອິນເດຍ ໄດ້ຕົກລົງກັນເພື່ອຫາທາງແກ້ໄຂປັນຫາທີ່ຈະສາມາດຍອມຮັບຮ່ວມກັນໄດ້ ພ້ອມສ້າງຄວາມໝັ້ນຄົງເທິງຜືນແຜ່ນດິນ ໂດຍຫຼີກລ່ຽງການກະທຳທີ່ເປັນການຂັດແຍ່ງຈາກຝ່າຍໃດຝ່າຍໜຶ່ງ ເຊິ່ງອາດຈະເພີ່ມທະວີຄວາມຕຶງຄຽດຂຶ້ນຕື່ມອີກ.