ວັນທີ 13 ກໍລະກົດ 2021 ສໍານັກຂ່າວ CNN ລາຍງານວ່າ ໄດ້ເກີດເຫດໂຮງແຮມຖະຫຼົ່ມ ຢູ່ທີ່ເມືອງ Jiangsu (ຈຽງຊູ) ທາງພາກຕາເວັນອອກຈີນ ໃນຂະນະທີ່ມີຄົນເຂົ້າພັກອາໄສຢູ່ໃນໂຮງແຮມຈໍານວນຫຼາຍ ສົ່ງຜົນໃຫ້ມີຜູ້ເສຍຊີວິດທັນທີ 8 ສົບ ແລະ ສູນຫາຍອີກ 9 ຄົນ.
ເຈົ້າໜ້າທີ່ກູ້ໄພຈີນ ຍັງຄົງເລັ່ງຊ່ວຍຊີວິດຜູ້ທີ່ຕິດຢູ່ໃນອາຄານ 23 ຄົນ ແລະ ຄົ້ນຫາຜູ້ສູນຫາຍອີກ 9 ຄົນ ຫຼັງເກີດເຫດໂຮງແຮມຖະຫຼົ່ມຊ່ວງເຊົ້າທີ່ຜ່ານມາໃນເມືອງ ຈູໂຊ ເມືອງທ່ອງທ່ຽວຂອງຈີນ ຈົນເຖິງຂະນະນີ້ ເຈົ້າໜ້າທີ່ກູ້ໄພສາມາດຊ່ວຍຊີວິດອອກມາໄດ້ແລ້ວ 6 ຄົນ ແລະ ຍັງຄົງລະດົມກໍາລັງອີກຫຼາຍກວ່າ 600 ຄົນ ຈາກໜ່ວຍກູ້ໄພແຜ່ນດິນໄຫວ ແລະ ລົດຕັກດິນອີກ 120 ຄັນ ເຂົ້າຊ່ວຍເຫຼືອໃນປະຕິບັດການຄັ້ງນີ້ ໂດຍມີການໃຊ້ລົດເຄຣນ, ຂັ້ນໄດ ແລະ ນໍາໃຊ້ໝາໃນການດົມກິ່ນເຂົ້າຊ່ວຍຫາຄົນທີ່ລອດຊີວິດໃຫ້ໄວທີ່ສຸດ.
ຂໍ້ມູນຈາກເວັບໄຊ້ທ່ອງທ່ຽວ ຊີທຣິບ ລະບຸວ່າ ໂຮງແຮມ ຊິຈິ ໄຄຫຍວນ ແຫ່ງນີ້ຫາກໍເປີດໃຊ້ງານເມື່ອປີ 2018 ໂດຍມີຫ້ອງພັກຈໍານວນ 54 ຫ້ອງ ສ່ວນສາເຫດຂອງອຸບັດຕິເຫດຄັ້ງນີ້ຍັງຢູ່ໃນລະຫວ່າງການກວດສອບ.
ປັດຈຸບັນ, ເມືອງຊູໂຈ ມີປະຊາກອນອາໄສຢູ່ຫຼາຍກວ່າ 12 ລ້ານຄົນ ຢູ່ຫ່າງຈາກນະຄອນຊຽງໄຮ້ ໄປທາງຕະເວັນອອກ ປະມານ 100 ກິໂລແມັດ ນັບເປັນເມືອງທ່ອງທ່ຽວແຫ່ງສໍາຄັນຂອງປະເທດຈີນ ເນື່ອງຈາກມີຄອງນໍ້າບູຮານທີ່ສວຍງາມ ລວມທັງສວນອາຍຸເກົ່າແກ່ນັບຮ້ອຍປີ. ໂດຍເຫດອາຄານຖະຫຼົ່ມໃນຈີນແມ່ນໄດ້ເກີດຂຶ້ນຫຼາຍຄັ້ງ ເນື່ອງຈາກໂຄງສ້າງທີ່ບໍ່ໄດ້ມາດຕະຖານ ແລະ ມີການທຸຈະລິດຄໍລັບຊັ່ນງົບປະມານໃນການກໍ່ສ້າງ