SCMP: ໂຄງການແບ່ງປັນທົ່ວໂລກໄດ້ລົງນາມເຊັນສັນຍາກັບບໍລິສັດຜະລິດວັກຊິນຈີນສອງແຫ່ງ ໃນການຈັດຫາວັກຊິນປ້ອງກັນພະຍາດໂຄວິດ-19 ຈຳນວນ 110 ລ້ານຫຼອດ ເຊິ່ງເປັນສ່ວນໜຶ່ງຂອງຂໍ້ຕົກລົງການຈັດຊື້ລ່ວງໜ້າ ພ້ອມຈັດສົ່ງຢ່າງຮີບດ່ວນໄປຍັງບັນດາປະເທດທຸກຍາກ ພາຍໃຕ້ໂຄງການ Covax.

ກາວີ, ຫຼື ອົງກອນພັນທະມິດເພື່ອວັກຊິນ ເຊິ່ງເປັນຫຸ້ນສ່ວນຂອງພາກລັດ ແລະ ເອກະຊົນ ເປີດເຜີຍວ່າ: ຈະມີການແຈກຢາຍວັກຊິນຊີໂນຟາມ 60 ລ້ານຫຼອດພາຍໃນເດືອນນີ້ ແລະ ເດືອນຕຸລາ ຂະນະທີ່ຊີໂນແວັກ 50 ລ້ານຫຼອດຈະແຈກຢາຍໃນທ້າຍເດືອນກັນຍາ. ພ້ອມກັນນັ້ນ, ກາວີ ຍັງມີຕົວເລືອກໃນການສັ່ງຊື້ວັກຊິນຊີໂນຟາມເພີ່ມ 60 ລ້ານຫຼອດໃນທ້າຍປີນີ້ ແລະ ອີກ 50 ລ້ານຫຼອດໃນກາງປີໜ້າ, ສຳລັບຂໍ້ຕົກລົງກັບຊີໂນແວັກນັ້ນ, ກາວີ ສາມາດຊື້ວັກຊິນເພີ່ມໄດ້ອີກ 150 ລ້ານຫຼອດໃນທ້າຍປີນີ້ ແລະ ອີກ 180 ລ້ານຫຼອດໃນກາງປີໜ້າ ເຊິ່ງຈະເຮັດໃຫ້ບັນດາປະເທດທີ່ເຂົ້າຮ່ວມໂຄງການ Covax ໃນ 135 ປະເທດ ສາມາດເຂົ້າເຖິງວັກຊິນດັ່ງກ່າວໄດ້.

ຂໍ້ຕົກລົງການຈັດຊື້ກັບຊີໂນຟາມ ແລະ ຊີໂນແວັກ ເຊິ່ງໄດ້ຮັບການກວດສອບໂດຍອົງການອະນາໄມໂລກເພື່ອນຳໃຊ້ໃນກໍລະນີສຸກເສີນເພື່ອຕ້ານສາຍພັນເດລຕ້າ ເຊິ່ງເຊື່ອວ່າເປັນສາຍພັນທີ່ສາມາດແຜ່ເຊື້ອໄດ້ໄວກວ່າສາຍພັນອື່ນ ທັງກໍ່ໃຫ້ເກີດຄວາມສ່ຽງຕໍ່ສຸຂະພາບຫຼາຍຂຶ້ນ, ຂໍ້ຕົກລົງດັ່ງກ່າວຄາດວ່າຈະຊ່ວຍບັນເທົາຄວາມຂາດແຄນຂອງຈຳນວນວັກຊິນທີ່ສະໜອງໂດຍ Covax Facility ເຊິ່ງເປັນໂຄງການແບ່ງປັນທົ່ວໂລກ ມີເປົ້າໝາຍແນໃສ່ໃຫ້ທຸກຄົນສາມາດເຂົ້າເຖິງວັກຊິນໄດ້.