Foodpanda ທຸລະກິດຝ່າຍຈັດສົ່ງອາຫານ ພາຍໃຕ້ການພັດທະນາຕົນເອງຈົນເຕີບໃຫຍ່ຂະຫຍາຍໂຕຢ່າງບໍ່ຢຸດຢັ້ງ ໃນທີ່ສຸດກໍກ້າວຂຶ້ນສູ່ອັນດັບຕົ້ນໆໃນບັນດາປະເທດອາຊີເຖິງຈະມີຄູ່ແຂ່ງຫຼາຍບໍລິສັດເກີດຂຶ້ນປານດອກເຫັດກໍຕາມ.
ທ່ານ ຈາຄັອບ ແອງເຈເລ, ຜູ້ບໍລິຫານສູງສຸດ ຂອງ Foodpanda Asia ກ່າວຕໍ່ Bloomberg Television ວ່າ: Foodpanda ຂອງບໍລິສັດ Delivery Hero SE ໄດ້ເຕີບໂຕຂຶ້ນຈົນເປັນແອັບພລີເຄຊັ່ນຈັດສົ່ງອາຫານທີ່ໃຫຍ່ທີ່ສຸດໃນບັນດາປະເທດອາຊີລວມມີ ສປປ ລາວຮ່ວມຢູ່ນຳ ຍົກເວັ້ນຈີນ ແລະ ຄາດວ່າຈະມີການຂະຫຍາຍຕົວເພີ່ມຂຶ້ນໃນດ້ານຕ່າງໆໂດຍສະເພາະກໍແມ່ນ ຮ້ານຂາຍເຄື່ອງຍ່ອຍ.
ການລະບາດຄັ້ງໃຫຍ່ຂອງພະຍາດໂຄວິດ-19 ໄດ້ອຳນວຍຜົນປະໂຫຍດແກ່ຕະຫຼາດຂົນສົ່ງອາຫານຢ່າງ Foodpanda ພໍສົມຄວນເນື່ອງຈາກຜູ້ຄົນນິຍົມສັ່ງອາຫານມາຮັບປະທານທີ່ເຮືອນຂອງຕົນຫຼາຍຂຶ້ນ, ເຖິງແມ່ນຈະມີຄູ່ແຂ່ງໃນເຄືອທຸລະກິດສົ່ງອາຫານຢ່າງ Grab Holdings Inc., Gojek ແລະ Deliveroo Plc ກໍຕາມ.
“ການເຕີບໂຕຂອງ Foodpanda ບໍ່ພຽງສະເພາະແຕ່ຊ່ວງການລະບາດຂອງພະຍາດໂຄວິດເທົ່ານັ້ນ, ແຕ່ຍັງລວມເຖິງປີກ່ອນໆຂອງຊ່ວງໂຄວິດລະບາດນຳອີກ ເພາະພວກເຮົາເຫັນໄດ້ເຖິງອັດຕາການເຕີບໂຕທີ່ເພີ່ມຂຶ້ນທຸກໆປີ.” ທ່ານ ຈາຄັອບ ກ່າວ.
Delivery Hero ຈາກເບີລິນກ່າວໃນອັບເດດລາຍໄຕມາດຫຼ້າສຸດ ເຊິ່ງຄາດວ່າລາຍຮັບຈະເພີ່ມຂຶ້ນໃນປີນີ້ ເນື່ອງຈາກມີການຂະຫຍາຍສູ່ຕະຫຼາດອາຊີໃໝ່ ແລະເພີ່ມຈຳນວນ “ຮ້ານຄ້າມືດ” ຫຼື ສາງເກັບສິນຄ້າຂາຍເຄື່ອງຍ່ອຍ ແລະ ເຄື່ອງໃຊ້ໃນຄົວເຮືອນ. ພ້ອມກັນນັ້ນກໍຍັງລວມເຖິງການເຂົ້າຊື້ກິດຈະການຂອງບໍລິສັດ ແລະການເຂົ້າຖືຫຸ້ນໃນບໍລິສັດ Woowa Brothers Corp ເຊິ່ງເປັນຄູ່ແຂ່ງຂອງເກົາຫຼີໃຕ້.
Foodpanda ປະກາດໃນເດືອນກຸມພາຜ່ານມາວ່າຈະເລີ່ມບໍລິການຈັດສົ່ງສິນຄ້າອອນລາຍໃນຍີ່ປຸ່ນ, ມຽນມາ, ກຳປູເຈຍ ແລະ ລາວໃນປີນີ້ ພາຍໃຕ້ຊື່ Pandamart ພາຍຫຼັງເປີດໂຕໃນ 8 ປະເທດຂອງອາຊີປີກາຍນີ້.