ເຫດການນີ້ເກີດຂຶ້ນເມື່ອວັນທີ 21 ມິຖຸນາ 2021 ທີ່ຜ່ານມາໃນລັດໂຄໂລຣາໂດ, ສະຫະລັດອາເມລິກາ ທາງເຈົ້າໜ້າທີ່ຕໍາຫຼວດໄດ້ຮັບແຈ້ງເຫດວ່າມີຊາຍໜຸ່ມຕ້ອງສົງໃສຄົນໜຶ່ງ ເຈົ້າໜ້າທີ່ຕໍາຫຼວດຄົນດັ່ງກ່າວໄດ້ເຂົ້າໄປກວດສອບຈຶ່ງໄດ້ພົບເຫັນຊາຍໜຸ່ມໄວກາງຄົນອາຍຸ 59 ປີ ຄົນໜຶ່ງຢູ່ໃນລົດ ເຊິ່ງໃສ່ໝວກ ແລະ ໃສ່ໜ້າກາກອະນາໄມເພື່ອປິດບັງໃບໜ້າ ໂດຍຊາຍຄົນດັ່ງກ່າວຊື່ວ່າ Ronald Troyke ເມື່ອເຈົ້າໜ້າທີ່ຕໍາຫຼວດເຂົ້າໄປໃກ້ ຊາຍຄົນດັ່ງກ່າວຈຶ່ງໄດ້ຈົກປືນອອກມາຍິງໃສ່ເຈົ້າໜ້າທີ່ຕໍາຫຼວດຈົນເສຍຊີວິດຄາທີ່. ຫຼັງຈາກນັ້ນ, ຊາຍຄົນດັ່ງກ່າວກໍມີອາການໄລ່ຍິງລົດຕໍາຫຼວດທີ່ຈອດຢູ່ໃກ້ບໍລິເວນນັ້ນ ເຮັດໃຫ້ປະຊາຊົນທີ່ຜ່ານໄປມາຮູ້ສຶກຕົກໃຈ ແລະ ພາກັນຫຼົບໜີເພື່ອຄວາມປອດໄພ.
ຫຼັງຈາກນັ້ນ, ຊາຍຄົນດັ່ງກ່າວກໍໄດ້ໄປປ່ຽນປືນຢູ່ລົດແລ້ວຍ່າງໄປຕາມຮ້ານຄ້າຕ່າງໆ ໃນຂະນະດຽວກັນ ພົນລະເມືອງດີຊື່ວ່າ Johnny Hurley ເປັນຄົນທີ່ຢູ່ບໍລິເວນນັ້ນພໍດີ ເຂົາຈຶ່ງໄດ້ຈົກປືນຂອງຕົນເອງອອກມາຍິງໃສ່ຄົນຮ້າຍໃນທັນທີເຮັດໃຫ້ຄົນຮ້າຍລົ້ມລົງກັບພື້ນ ຈາກນັ້ນ Johnny Hurley ກໍໄດ້ເຂົ້າໄປເອົາປືນອອກຈາກໂຕຂອງຄົນຮ້າຍ ເຊິ່ງພໍດີກັບກອງກໍາລັງຕໍາຫຼວດທີ່ເຂົາມາສົມທົບເຫັນ Johnny Hurley ກໍາລັງຈັບປືນຂອງຄົນຮ້າຍຈຶ່ງຍິງປືນໃສ່ຈົນເຮັດໃຫ້ພົນລະເມືອງດີຄົນດັ່ງກ່າວເສຍຊີວິດໃນທັນທີ.
ຫຼັງຈາກເຫດການດັ່ງກ່າວສະຫງົບລົງທາງດ້ານໜ່ວຍງານຕໍາຫຼວດຂອງລັດໂຄໂລຣາໂດ ໄດ້ອອກມາຖະແຫຼງຂ່າວສະແດງຄວາມເສຍໃຈຕໍ່ກັບເຫດການທີ່ເກີດຂື້ນ ແລະ ຍ້ອງຍໍໃຫ້ Johnny Hurley ເປັນວິລະບູລຸດຄົນສໍາຄັນໃນເຫດການຄັ້ງນີ້ ແລະ ໜ່ວຍງານຕໍາຫຼວດຍັງໄດ້ສະແດງຄວາມຮູ້ສຶກຜິດດ້ວຍການເປີດການລະດົມທຶນເພື່ອຊ່ວຍເຫຼືອຄອບຄົວຂອງ Johnny Hurley ເຊິ່ງປັດຈຸບັນຍອດບໍລິຈາກແມ່ນໄດ້ປະມານ 600,000,000 ກີບ.