“Independent” ໄດ້ລາຍງານວ່າ ຍິງສາວຈອມປ່ວນຊາວເຢຍລະມັນ ໄວ 30 ປີ ຖືກຈັບກຸມໃນຂໍ້ຫາ ເຮັດໃຫ້ຜູ້ອື່ນໄດ້ຮັບບາດເຈັບໂດຍບໍ່ເຈຕະນາ ໃນງານແຂ່ງລົດຖີບ “ຕູຣ໌ ເດິ ຟຣອງຊ໌”  ພ້ອມຖືກປັບໄໝເປັນເງິນຈຳນວນ 1,500 ຢູໂຣ ຫຼື ປະມານ 16,5 ລ້ານກີບ.

ຈາກເຫດການສົນລະວົນໃນງານແຂ່ງຂັນປັ່ນລົດຖີບທາງໄກ “ຕູຣ໌ ເດິ ຟຣອງຊ໌” ເຊິ່ງຈັດຂຶ້ນທີ່ປະເທດ ຝຣັ່ງເສດ ໃນມື້ວັນເສົາຜ່ານມາ ໄດ້ມີແມ່ຍິງຄົນໜຶ່ງ ບໍ່ຮູ້ຄິດແນວໃດຈິ່ງພະຍາຍາມຍ່າງລົງສະໜາມແຂ່ງພ້ອມຊູປ້າຍເຊຍໃຫ້ກ້ອງຖ່າຍທອດສົດ ຈົນເປັນເຫດປະທະກັບ ໂທນີ ມາຣ໌ຕິນ ນັກປັ່ນຊາວເຢຍລະມັນເສຍຈັງຫວະລົ້ມລົງ.

ຈັງຫວະດຽວກັນນັກປັ່ນຄົນອື່ນໆທີ່ກຳລັງຖີບລົດຕໍ່ແຖວກັນມາທາງຫຼັງເກືອບ 50 ຄົນ ກໍຕ້ອງປະທະລົງມາກອງກັນເຕັມພື້ນສະໜາມ, ນັກປັ່ນ 21 ຄົນໄດ້ຮັບບາດເຈັບ ຈົນເຮັດໃຫ້ງານແຂ່ງຂັນຕ້ອງຢຸດສະຫງັກ 5 ນາທີ, ຈັດໄດ້ວ່າເປັນການເກີດອຸບັດເຫດຄັ້ງຍິ່ງໃຫຍ່ທີ່ໂຫດຮ້າຍທີ່ສຸດໃນປະຫວັດສາດຂອງການແຂ່ງຂັນກໍວ່າໄດ້.

ຫຼ້າສຸດເຈົ້າໜ້າທີ່ຕຳຫຼວດຝຣັ່ງເສດ ສາມາດເຂົ້າຈັບກຸມຍິງສາວຜູ້ກໍ່ເຫດໄດ້ໃນມື້ວານນີ້ຕາມເວລາທ້ອງຖິ່ນ ເຊິ່ງເຈົ້າໜ້າທີ່ໄດ້ຄຸມຕົວຍິງດັ່ງກ່າວໄປທີ່ເມືອງ ລອງແຄຣ໌ໂນ.

ຢ່າງໃດກໍຕາມ, ແມ່ຍິງຜູ້ກໍເຫດມີສິດໄດ້ຮັບໂທດສະຖານໜັກພໍສົມຄວນ ເຊິ່ງອາດເຖິງຂັ້ນຕິດຄຸກ 1 ປີ ພ້ອມປັບໄໝເປັນເງິນເພີ່ມອີກປະມານ 13,000 ປອນ ຫຼື 160 ລ້ານກີບ.

ການແຂ່ງຂັນປັ່ນລົດຖີບທາງໄກ “ຕູຣ໌ ເດິ ຟຣອງຊ໌” ເຄີຍເກີດເຫດການຄ້າຍຄືກັນໃນປີ 1994 ເຊິ່ງນັກປັ່ນລົດຖີບໄດ້ປະທະກັບເຈົ້າໜ້າທີ່ຕຳຫຼວດທີ່ກຳລັງຢືນຮັກສາຄວາມປອດໄພຕາມແຄມທາງ ກ່ອນທີ່ນັກປັ່ນຜູ້ເຄາະຮ້າຍກຳລັງຈະເຂົ້າສູ່ເສັ້ນໄຊ.