ກຸ່ມຄົນພື້ນເມືອງກຸ່ມໜຶ່ງໃນລັດ Saskatchewan (ຊັດແຄດເຊວັນ) ເຜີຍວ່າ ຄົ້ນພົບສົບ 751 ສົບໃນບໍລິເວນທີ່ເຄີຍເປັນໂຮງຮຽນປະຈໍາຄາທໍລິກສໍາລັບນັກຮຽນເຊື້ອສາຍພື້ນເມືອງ.
ບອບບີ້ ແຄມຣອນ ຫົວໜ້າສະມາພັນຊົນຊາດທໍາອິດດັ້ງເດີມທີ່ມີອະທິປະໄຕໃນ Saskatchewan ກ່າວວ່າ ສິ່ງທີ່ເກີດຂຶ້ນນີ້ ເປັນອາດສະຍາກໍາຕໍ່ມະນຸດຊາດ ຄາດວ່າອາດຈະພົບຫຼຸມສົບເພີ່ມຕື່ມຫຼັ້ງຈາກນີ້ທີ່ໃຕ້ດິນຂອງໂຮງຮຽນປະຈໍາທົ່ວການາດາ ແລະ ເຊື່ອວ່າຈະມີການຄົ້ນຫາອີກແນ່ນອນ.
ບອບບີ້ ແຄມຣອນ ໄດ້ກ່າວໄວ້ວ່າ “ເຮົາຈະບໍ່ຢຸດຄົ້ນຫາ ຈົນກວ່າເຮົາຈະພົບສົບທັງໝົດ”
ນັກຮຽນທັງ 751 ສົບນີ້, ພົບເຫັນທີ່ໂຮງຮຽນປະຈໍາອິນດຽນແມຣິວອນ ທີ່ເປີດລະຫວ່າງປີ 1899-1997 ຕັ້ງຢູ່ທາງຕາເວັນອອກຂອງເມືອງຣິໄຈນາ, ເມືອງຫຼວງຂອງລັດຊັດແຄັດເຊວັນ.
ຈັສຕິນ ທຣູໂດ ນາຍົກລັດຖະມົນຕີການາດາ ກ່າວວ່າ ຕົນຮູ້ສຶກເສຍໃຈຫຼາຍຕໍ່ການຄົ້ນພົບສົບຄັ້ງນີ້ ແລະ ກ່າວຕໍ່ກຸ່ມຄົນພື້ນເມືອງວ່າ ຄວາມເຈັບປວດ ແລະ ຄວາມສະເທືອນໃຈທີ່ຄົນພື້ນເມືອງຮູ້ສຶກເປັນສິ່ງທີ່ການາດາມີໜ້າທີ່ຕ້ອງຮັບຜິດຊອບ.
ການຄົ້ນພົບຄັ້ງນີ້, ເກີດຂຶ້ນຫຼັງຈາກສະມາພັນຊົນຊາດດັ້ງເດີມທີ່ມີອະທິປະໄຕໃນລັດຊັດແຄັດເຊວັນ ອອກຄົ້ນຫາຮ່ວມກັບທີມກວດໃຕ້ດິນດ້ວຍສັນຍານເຣດ້າ ຈາກສະຖາບັນໂປລິເທັກຊັສແຄດເມື່ອ 3 ອາທິດທີ່ແລ້ວ.
ການຄົ້ນພົບນີ້, ຍັງເກີດຂຶ້ນຫຼັງຈາກການພົບສົບເດັກນ້ອຍ 215 ສົບ ທີ່ບາງລາຍມີອາຍຸພຽງ 3 ປີ ທີ່ອາດີດໂຮງຮຽນປະຈໍາສໍາລັບນັກຮຽນພື້ນເມືອງທີ່ໃຫຍ່ທີ່ສຸດແຫ່ງໜຶ່ງຂອງການາດາ ທີ່ເມືອງແຄມລູບ ລັດບຣິຕິສໂຄລໍາເບຍ ເມື່ອປາຍເດືອນພຶດສະພາ.