ໃນວັນທີ 22 ມິຖຸນາ 2021 ທີ່ຜ່ານມາ ສໍານັກຂ່າວອິດສະຫຼະຂອງປະເທດມຽນມາໄດ້ລາຍງານເຖິງສະຖານະການການຕໍ່ຕ້ານລັດຖະບານທະຫານໃນນະຄອນມັນດາເລວ່າ: ໄດ້ເກີດມີການຕໍ່ສູ້ກັນລະຫວ່າງເຈົ້າໜ້າທີ່ຝ່າຍຄວາມໝັ້ນຄົງກັບກອງກໍາລັງປົກປ້ອງປະຊາຊົນ ໂດຍເຈົ້າໜ້າທີ່ຝ່າຍຄວາມໝັ້ນຄົງປະມານ 20 ຄົນໄດ້ໃຊ້ອາວຸດປືນ ແລະ ລົດຫຸ້ມເກາະປະມານ 3 ຄັນເຂົ້າໂຈມຕີກອງກໍາລັງຝ່າຍຕໍ່ຕ້ານລັດຖະບານທະຫານ ເຮັດໃຫ້ຝ່າຍກໍາລັງຕໍ່ຕ້ານລັດຖະບານທະຫານຖືກຈັບກຸມຈໍານວນ 6 ຄົນ ແລະ ຝ່າຍທະຫານມຽນມາເສຍຊີວິດ 2 ຄົນ.

ທາງດ້ານສະຖານທູດສະຫະລັດອາເມລິກາປະຈໍານະຄອນຍ່າງກຸ້ງໄດ້ໂພສໃນເຟສບຸກວ່າ ກໍາລັງມີການຕິດຕາມການລາຍງານການປະທ້ວງໃນມັນດາເລ ລວມເຖິງການລາຍງານເບື້ອງຕົ້ນກ່ຽວກັບການເສຍຊີວິດຂອງປະຊາຊົນທີ່ອາດຈະເກີດຂື້ນ ແລະ ທາງສະຖານທູດເອງຮູ້ສຶກບໍ່ສະບາຍໃຈທີ່ທາງກອງທັບມຽນມາມີຄວາມຮຸນແຮງຕໍ່ກັບປະຊາຊົນ ແລະ ຮຽກຮ້ອງໃຫ້ຢຸດໃຊ້ຄວາມຮຸນແຮງກັບປະຊາຊົນໂດຍດ່ວນ.