ໃນວັນອັງຄານ ທີ 15 ມິຖຸນາ 2021 ທີ່ຜ່ານມາ ສໍານັກຂ່າວຕ່າງປະເທດໄດ້ລາຍງານວ່າ ທ່ານ ຄິມ ຈອງ ອຶນ ຜູ້ນໍາຂອງປະເທດເກົາຫຼີເໜືອໄດ້ກ່າວຕໍ່ກອງປະຊຸມສະມາຊິກພັກແຮງງານເກົາຫຼີວ່າກໍາລັງເກີດພາວະຂາດແຄນອາຫານ ເຖິງແມ່ນວ່າເສດຖະກິດໂດຍລວມຈະພັດທະນາຂື້ນກໍຕາມ ແຕ່ປັດໄຈ ແລະ ສະພາບແວດລ້ອມຕ່າງໆທີ່ເກົາຫຼີເໜືອຕ້ອງພົບນັ້ນແມ່ນມີຄວາມຫຍຸ້ງຍາກຫຼາຍ.
ແຕ່ທັງນີ້ທ່ານ ຄິມ ຈອງ ອຶນ ບໍ່ໄດ້ເປີດເຜີຍຈໍານວນທີ່ເກົາຫຼີເໜືອຂາດແຄນອາຫານ ແຕ່ມີແນວໂນ້ມທີ່ຮຸນແຮງ ໂດຍທ່ານ ຄິມ ຈອງ ອຶນ ໄດ້ຮຽກຮ້ອງໃນທີ່ປະຊຸມຂອງນັກການເມືອງລະດັບສູງ ເພື່ອຂໍໃຫ້ກຽມພ້ອມຫາທາງແກ້ໄຂ. ທາງດ້ານອົງການອາຫານ ແລະ ກະສິກໍາແຫ່ງປະຊາຊາດ (FAO) ໄດ້ປະເມີນວ່າເກົາຫຼີເໜືອເຫຼືອອາຫານບໍ່ຮອດ 860,000 ຕັນ ເຊິ່ງສາມາດລ້ຽງປະຊາຊົນໄດ້ພຽງແຕ່ 2 ເດືອນເທົ່ານັ້ນ.