ແມ່ຍິງຄົນໜຶ່ງຕໍ່ສູ້ຢ່າງໜັກເພື່ອດຶງຕົວເອງອອກຈາກເຫວເລິກກ່ອນຈະສາມາດປະສົບຄວາມສຳເລັດ ຫຼັງຈາກຜ່່ານຊ່ວງເວລາຊີວິດທີ່ຕົກຕໍ່າມາໄດ້.
ເລື່ອງລາວທີ່ໜ້າຊື່ນຊົມນີ້ເປັນຂອງ ຈິນນີ ເບີຕັນ ໄວອາຍຸ 48 ປີ ນາງໄດ້ເລົ່າເຖິງຊ່ວງໄລຍະທີມືດມົນທີ່ສຸດຂອງຊີວິດວ່າ ນາງເກີດທີ່ທາໂຄມາ ໃນລັດວໍຊິງຕັນ ປະເທດສະຫະລັດອາເມລິກາ ນາງຖືກແນະນຳໃຫ້ຮູ້ຈັກ ແລະ ໃຊ້ກັນຊາເມື່ອຕອນອາຍຸນາງໄດ້ພຽງ 6 ປີ ໂດຍແມ່ແທ້ໆຂອງນາງທີ່ຕິດຢາ ແລະ ມີອາການປ່ວຍທາງຈິດ.
ໃນຂະນະທີ່ພໍ່ຂອງນາງກໍ່ຕິດຄຸກໃນຂໍ້ຫາລັກຊັບດ້ວຍອາວຸດ ແລະ ເມື່ອຕອນທີ່ນາງອາຍຸ 12ປີ ນາງໄດ້ຮູ້ຈັກກັບຢາບ້າ ເປັນຄັ້່ງທຳອິດ ແລະ ເມື່ອອາຍຸໄດ້ 14ປີ ນາງກໍ່ເລີ່ມໃຊ້ໂຄເຄນ ນາງກ່າວວ່າ ຊີວິດໃນໄວເດັກຂອງນາງສ່ວນໃຫຍ່ແມ່ນຢູ່ໃນວົງຈອນຢາເສບຕິດ ແລະ ເມື່ອຕອນທີ່ນາງອາຍຸ 17ປີ ນາງໄດ້ພະຍາຍາມຂ້າຕົວຕາຍຫຼັງຈາກຖືກຂົ່ມຂືນໂດຍຜູ້ຊາຍທີ່ມາຊື້ຢາເສບຕິດຈາກແມ່ຂອງນາງ.
ເມື່ອນາງໄດ້ອາຍຸ 23ປີ ນາງໄດ້ກຳເນີດລູກ 2 ຄົນ ແຕ່ໃນຕອນນັ້ນນາງບໍ່ສາມາດເຮັດໜ້າທີ່ແມ່ທີ່ດີໄດ້ ທັງຍັງຕິດເຮໂຣອິນຢ່າງໜັກ ແລະ ນາງເຄີຍປົ້ນຈີ້ພໍ່ຄ້າຊາວເມັກຊີໂກດ້ວຍການໃຊ້ປືນຈີ້ ແລະ ລັກລົດ ເພື່ອຫາເງິນໄປຊື້ຢາເສບຕິດເພີ່ມ ຈົນໃນທີ່ສຸດລູກທັງສອງຄົນກໍຖືກຖອດຊື່ອອກຈາກການດູແລຂອງນາງ.
ນາງໄດ້ເລົ່າກັບສຳນັກຂ່າວໜຶ່ງວ່າ ນາງຕ້ອງໃຊ້ຊີວິດຢູ່ຕາມຖະໜົນ ມີກິ່ນຕົວທີ່ເໝັນ ແລະ ບໍ່ສາມາດອາບນໍ້າໄດ້ ເຖິງແມ່ນວ່າຈະພະຍາຍາມເລີກການກະທຳເຫຼົ່ານັ້ນກໍ່ຕາມແຕ່ສຸດທ້າຍທຸກຢ່າງກໍ່ພັງລົງ ນາງກາຍເປັນເຫຍື່ອຂອງຜູ້ຄົນຕາມຖະໜົນ ແລະ ຮູ້ສຶກໝົດຫວັງກັບຊີວິດ.
ທັງນີ້, ມີລາຍງານວ່າຈິນນີ້ ຖືກຕັດສິນໂທດໃນຄະດີຮ້າຍແຮງກວ່າ 17 ຄະດີ ແລະ ຖືກສົ່ງຕົວເຂົ້າຄຸກເຖິງ 3 ຄັ້ງ ເຖິງແມ່ນວ່າເຮືອນຈຳຈະເປີດໂອກາດໃຫ້ນາງກັບຕົວ ແຕ່ນາງກໍ່ຍັງກັບໄປເສບຢາອີກ ຈົນເມື່ອປີ 2012 ນາງໄດ້ຖືກຈັບໃນຂໍ້ຫາໜຶ່ງມັນໄດ້ເລີ່ມເຮັດໃຫ້ນາງມີສະຕິຂຶ້ນ ນາງໄດ້ຕັດສິນໃຈປ່ຽນແປງຄັ້ງໃຫຍ່ ຫຼັງຈາກໂຄງການເສບຢາເສບຕິດທີ່ສານສັ່ງ ແລະ ນາງກໍ່ເລີ່ມກັບມາຮຽກໜັງສືອີກຄັ້ງ.
ນາງກ່າວເວລາທີ່ຜ່ານມາມັນສູນເສຍໄປລ້າໆ ແລະ ນາງກໍ່ພົບວ່ານາງມ່ວນກັບການຮຽນໜັງສື ຫຼັງຈາກທີ່ຍ້າຍໄປຮຽນທີ່ມະຫາວິທະຍາໄລວໍຊິງຕັນ ນາງໄດ້ຮັບທຶນການສືກສາ ແລະ ໄດ້ເຂົ້າຮ່ວມທີມວິຊາການຂອງມະຫາວິທະຍາໄລທັງໝົດ ແລະ ອີກໜຶ່ງປີຕໍ່ມາໄດ້ຮັບເລືອກໃຫ້ເປັນ Truman Scholar ປີ 2020 ໃນລັດວໍຊິງຕັນ.
ໃນຕອນນີ້ນາງສຳເລັດດ້ານການສຶກສາຈາກມະຫາວິທະຍາໄລວໍຊິງຕັນລະດັບປະລິຍາສາຂາລັດຖະສາດ ດ້ວຍໄວອາຍຸ 48ປີ ແລະ ຫວັງວ່າໃນອານາຄົດນາງຈະເຮັດວຽກໃນການປະຕິຮູບເຮືອນຈຳ.
ຫວັງວ່າເລືອງລາວຊີວິດທີ່ບໍ່ທຳມະດາຂອງນາງຈະເປັນແຮງບັນດານໃຈໃຫ້ກັບຄົນອື່ນໆ ທີ່ກຳລັງຕໍ່ສູ້ກັບການເສບຕິດຢາ.
ຮຽບຮຽງໂດຍ: ພຸດສະດີ