ເມື່ອວັນທີ 11 ມິຖຸນາ ສຳນັກຂ່າວ CNN ລາຍງານວ່າ ຄະນະນັກວິໄຈຈີນພົບກຸ່ມໄວຣັສໂຄໂຣນາສາຍພັນໃໝ່ໃນເຈຍ ເຊິ່ງໜ່ຶງໃນໄວຣັດທີີ່ຄົ້ນພົບທີ່ມີພັນທຸກຳໃກ້ຄຽງກັບພັນທຸກຳຂອງໄວຣັດໂຄວິດ-19.
ການຄົ້ນພົບນີ້ຂອງຂະນະວິໄຈຈີນຕີພິມລົງໃນວາລະສານ Cell ເຜີຍແຜ່ເມື່ອວັນທີ 10 ມິຖຸນາ 2021 ລະບຸວ່າຄົ້ນພົບກຸ່ມໄວຣັດໂຄໂຣນາໃນພື້ນທີ່ປ່າຂະໜາດນ້ອຍແຫ່ງໜຶ່ງໃນມົນທົນຢູນນານ ປະເທດຈີນ ເຊິ່ງສະແດງໃຫ້ເຫັນວ່າມີໄວຣັດໂຄໂຣນາໃນເຈຍຈັກຊະນິດ ແລະ ມີສັກກະພາບໃນການແຜ່ເຊື້ອສູ່ຄົນໄດ້ຫຼາຍພຽງໃດ.
ທ່ານ ສື່ ເວີ່ຍເຟິງ ນັກວິໄຈມະຫາວິທະຍາໄລຊານຕົງ ແລະ ຄະນະ ໄດ້ເກັບຕົວຢ່າງຈາກກຸ່ມເຈຍໃນປ່າລະຫວ່າງເດືອນພຶດສະພາ 2019 – ພະຈິກ 2020 ໄດ້ເຮັດການທົດສອບເກັບຕົວຢ່າງເຊື້ອນໍ້າລາຍຈາກປາກເຈຍ.
“ຈຳນວນທັງໝົດ 24 ຂໍ້ມູນທາງພັນທຸກຳຂອງພະຍາດ coronavirus ແມ່ນຖືກລວບລວມມາຈາກຫຼາຍສາຍພັນຕ່າງໆຂອງເຈຍ ລວມທັງໄວຣັດໂຄໂຣນາ 4 ຕົວທີ່ຄ້າຍກັບໄວຣັດໂຄໂຣນາ SARS-CoV-2 ລາຍງານຂອງທີມວິໄຈລະບຸ ໂດຍມີໄວຣັດໂຄໂຣນາຕົວໜຶ່ງທີ່ມີລັກສະນະທາງພັນທຸກຳຄ້າຍກັນຫຼາຍກັບໄວຣັດໂຄໂຣນາ SARS-CoV-2 ທີ່ເປັນສາເຫດຂອງການແຜ່ລະບາດໃຫຍ່ທົ່ວໂລກໃນເວລານີ້. ເປັນຕົວຢ່າງໄວຣັດທີ່ຮຽກວ່າ RpYN06 ທີ່ໄດ້ມາຈາກເຈຍ ຊື່ວິທະຍາສາດ Rhinolophus pusillus, ພົບວ່າມີເຊື້ອພັນທຸ ກຳຄ້າຍກັບ SARS-CoV-2, ເຊິ່ງຄວາມແຕກຕ່າງພຽງແຕ່ແມ່ນທາດໂປຼຕີນໃນໜາມໂປຣຕິນບໍລິເວນເປືອກນອກຂອງໄວຣັດເທົ່ານັ້ນ”.
ນັກວິໄຈກຳລັງພະຍາຍາມຄົ້ນຫາວ່າ SARS-CoV-2 ເຊິ່ງເປັນສາເຫດໃຫ້ເກີດໂຣກໂຄວິດ-19 ມາຈາກໃສ ເຖິງແມ່ນວ່າເຈຍຈະແມ່ນແຫຼ່ງເພາະພັນ ແຕ່ກໍ່ເປັນໄປໄດ້ທີ່ໄວຣັດຈະແຜ່ເຊື້ອໄປທີ່ສັດກ່ອນມາສູ່ຄົນ ຄືກັບໄວຣັດຊາຣ໌ທີ່ລະບາດໃນປີ 2002-2004.
ຮຽບຮຽງຂ່າວ: ພຸດສະດີ