ການເສຍຊີວິດຂອງເຈົ້າໜ້າທີ່ພັກສັນນິບາດແຫ່ງຊາດເພື່ອປະຊາທິປະໄຕ ຫຼື NLD ຂອງທ່ານນາງອອງຊານ ຊູຈີ ໃນຂະນະທີ່ຖືກຈັບໂຕ ເຫດການນີ້ຍິ່ງສະທ້ອນໃຫ້ເຫັນເຖິງຄວາມໂຫດຮ້າຍຂອງກອງທັບທະຫານມຽນມາ.
ຫຼັງຈາກທີ່ມຽນມາຕົກຢູ່ໃນສະຖານະການການເຮັດລັດຖະປະຫານ ເຮັດໃຫ້ບັນດາຜູ້ນໍາຂອງພັກສັນນິບາດແຫ່ງຊາດເພື່ອປະຊາທິປະໄຕຂອງທ່ານນາງອອງຊານ ຊູຈີ ໄດ້ຖືກຄວບຄຸມໂຕ ແລະ ທະຫານກໍໄດ້ໃຊ້ກໍາລັງເຂົ້າປາບປາມກັບປະຊາຊົນທີ່ລຸກຂື້ນຕໍ່ຕ້ານການເຮັດລັດຖະປະຫານຈົນເຮັດໃຫ້ມີຜູ້ເສຍຊີວິດເປັນຈໍານວນຫຼວງຫຼາຍໜຶ່ງໃນນັ້ນແມ່ນສອງເຈົ້າໜ້າຂອງພັກດັ່ງກ່າວທີ່ຖືກຄຸມໂຕໄປ ແລະ ເສຍຊີວິດແບບຍັງບໍ່ສາມາດສະຫຼຸບສາເຫດການຕາຍແບບຊັດເຈນ.
ທ່ານ ຂິ່ນ ໝ່ອງ ລັດ ແມ່ນໜຶ່ງໃນຄົນທີ່ມີບົດບາດໃນພັກສັນນິບາດແຫ່ງຊາດເພື່ອປະຊາທິປະໄຕຂອງມຽນມາ ພາຍຫຼັງທີ່ຖືກຄວບຄຸມໂຕໄປກໍໄດ້ເສຍຊີວິດພາຍໃນເວລາບໍ່ດົນ ໂດຍທາງຕໍາຫຼວດໄດ້ແຈ້ງກັບທາງຄອບຄົວວ່າສາເຫດການເສຍຊີວິດແມ່ນເກີດຈາກອາການຫົວໃຈວາຍ ແຕ່ທາງຄອບຄົວບໍ່ເຊື່ອເນື່ອງຈາກຕາມຮ່າງກາຍຂອງທ່ານ ຂິ່ນ ໝ່ອງ ລັດ ມີບາດແຜຫຼາຍບ່ອນ ແລະ ຮ່າງກາຍເຕັມໄປດ້ວຍເລືອດ.
ແລະ ຜູ້ເສຍຊີວິດຄົນທີສອງກໍຄືທ່ານ ຊໍ ເມັຍ ລິນ ທີ່ເປັນນັກເຄື່ອນໄຫວໃນການຕໍ່ຕ້ານລັດຖະບານທະຫານ ແລະ ຖືກຄວບຄຸມໂຕ ແລະ ເສຍຊີວິດໃນເວລາຕໍ່ມາ ໂດຍຕາມຮ່າງກາຍແມ່ນມີຮອຍຊໍ້າ, ບໍ່ລິເວນທ້ອງມີຮອຍຜ່າຕັດ ເຊິ່ງທາງສໍານັກສື່ທາງການຂອງມຽນມາໄດ້ລາຍງານວ່າສາເຫດຂອງການເສຍຊີວິດແມ່ນຕົກໃສ່ທໍ່ເຫຼັກຂະໜາດໃຫຍ່ໃນຂະນະທີ່ປີນກໍາແພງຫຼົບໜີ ແຕ່ທາງຄອບຄົວບໍ່ເຊື່ອໃນສິ່ງທີ່ທາງການທະຫານໄດ້ຊີ້ແຈງ.
ຈາກເຫດການດັ່ງກ່າວລັດຖະບານທະຫານຂອງມຽນມາບໍ່ໄດ້ອອກມາຊີ້ແຈງເຖິງຄວາມເປັນທໍາໃນການປະຕິບັດຕໍ່ກຸ່ມຜູ້ຕໍ່ຕ້ານລັດຖະປະຫານຢ່າງໂຫດຮ້າຍ ອາດຈະເປັນໄປໄດ້ວ່າການປະຕິບັດຂອງທະຫານຕໍ່ກັບທ່ານ ຂິ່ນ ໝ່ອງ ລັດ ແລະ ທ່ານ ຊໍ ເມັຍ ລິນ ນັ້ນເປັນການຕັດສິນໃຈຂອງໜ່ວຍທະຫານທີ່ຄວບຄຸມໂຕທັງສອງໄປ ຫຼື ອາດຈະຖືກກະຕຸ້ນຈາກສະຖານະການທີ່ຕຶງຄຽດພາຍໃນປະເທດ ແລະ ມີຄວາມຮູ້ສຶກກຽດຊັງນັກການເມືອງ.