ເວລາປະມານ 14:00 ໂມງ ຂອງວັນທີ 25 ພຶດ ສະພາ 2021 ທີ່ຜ່ານມາ, ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ແຂວງສະຫວັນນະເຂດ ເປີດເຜີຍວ່າ: ເຈົ້າໜ້າທີ່ກຳລັງວິຊາສະເພາະ ພະແນກ 303 ຫ້ອງຕໍາຫຼວດ ໂດຍສົມທົບກັບພາກສ່ວນທີ່ກ່ຽວຂ້ອງ ໄດ້ນໍາກໍາລັງເຂົ້າຈັບກຸມເປົ້າໝາຍຄ້າ-ຂາຍຢາເສບຕິດ ພາຍຫຼັງທີ່ສືບຮູ້ວ່າ: ຢູ່ທີ່ຂອບເຂດບ້ານ ຫຼັກ 35 ເມືອງຈໍາພອນ ແຂວງສະຫວັນນະເຂດ ສາມາດຈັບຕົວເປົ້າໝາຍໄດ້ 2 ຄົນ ຄື: ທ້າວ ສຸກສາຄອນ ຫຼື ໂຕ້ ອາຍຸ 35 ປີ (ນ້ອງເຂີຍ) ແລະ ນາງ ສີຝອງ ອາຍຸ 39 ປີ (ປ້າ) ທັງສອງຢູ່ບ້ານໂພສີແກ້ວ ເມືອງໄຊພູທອງ ແຂວງສະຫວັນນະເຂດ ພ້ອມຂອງກາງຢາບ້າ ຈຳນວນ 99 ມັດ ເທົ່າກັບ 198.000 ເມັດ, ລົດໃຫຍ່ 2 ຄັນ ຄື: ລົດກະບະມິດສຸບີຊິໄທຕັ້ນ ສີປອນ ໝາຍເລກທະບຽນ ກຈ 6197 ສະຫວັນນະເຂດ ແລະ ລົດເກັງ ອີເລັນ ຕ້າ ສີດໍາ ໝາຍເລກທະບຽນ ກກ 9726 ວຽງຈັນ ແລະ ໂທລະສັບ 2 ເຄື່ອງ ໄປດໍາເນີນຄະດີ.
ປັດຈຸບັນຄະດີດັ່ງກ່າວ, ກໍາລັງຢູ່ໃນຂັ້ນຕອນສືບສອບສວນ ຂອງເຈົ້າໜ້າທີ່ ປກສ ແຂວງສະຫວັນນະເຂດ ເພື່ອຕິດຕາມນຳຈັບຜູ້ຮ່ວມຂະບວນການມາດຳເນີນຄະດີຕາມກົດໝາຍຕໍ່ໄປ.