6 ອາຫານເພີ່ມພູມຄຸ້ມກັນໃນລະດູໜາວ
ພະຍາດໄຂ້ຫວັດ ເປັນພະຍາດທີ່ເກີດຈາກການຕິດເຊື້ອໄວຣັສໃນລະບົບທາງເດີນຫາຍໃຈສ່ວນເທິງ ໄດ້ແກ່ ດັງ ແລະ ຄໍ ພະຍາດນີ້ມັກພົບຫລາຍໃນ ລະດູໜາວ ເພາະຄວາມຊຸ່ມຊື່ນຕ່ຳ ແລະ ອາກາດເຢັນ
ເກີດຂຶ້ນໄດ້ຈາກການສູບດົມອາກາດທີ່ມີເຊື້ອເຂົ້າໄປ ການພົວພັນ ກັບ ຜູ້ປ່ວຍ ແລະ ສະພາບອາກາດທີ່ປ່ຽນແປງ ເມື່ອໄດ້ຮັບເຊື້ອໄຂ້ຫວັດເຂົ້າໄປຈະມີອາການອ່ອນເພຍ ເຈັບຫົວ ຄັດດັງ ມີນ້ຳມູກ ຈາມ ມີອາການໄອ ຈາກການອັກເສບຂອງຫລອດຄໍແລະ ອາດມີໄຂ້ຕ່ຳ ພະຍາດໄຂ້ຫວັດຈະມີໄລຍະເວລາປະມານ 3-5 ມື້ ແຕ່ອາດມີອາການໄອ ແລະ ນ້ຳມູກຕໍ່ເນື່ອງດົນອີກ 2 – 3 ອາທິດ
ສຳຫລັບ 6 ເມນູທີ່ກິນແລ້ວ ຊ່ວຍສ້າງພູມຄຸ້ມກັນໃຫ້ຮ່າງກາຍແຂງແຮງ ເພື່ອຮັບການປ່ຽນຜ່ານຈາກປາຍຝົນຕົ້ນໜາວ ມີດັ່ງນີ້
- ອາຫານລົດເຜັດຮ້ອນຈາກໝາກເຜັດ ແລະ ເຄື່ອງຄຽງເຊັ່ນ ໝາກເຜັດ ຜັກຫອມບົ່ວ ກະທຽມ ພິກໄທ ຂີງ ຂ່າ ຂີ້ໝິ້ນ ຫົວສີໄຄ ໃບກະເພົາ ສະໝຸນໄພຕ່າງໆ ທີ່ຊ່ວຍຫລຸດອາການຄັດດັງ ເຊັ່ນ ໃບບົວລະພາ ການພູ ນຳມາປະກອບອາຫານ ຈຳພວກແກງຮ້ອນໆ ເຊັ່ນ ຕົ້ມສົ້ມໄກ່ ຈະຊ່ວຍເຮັດໃຫ້ຫາຍໃຈໂລ່ງຂຶ້ນ ປັບສົມດຸນພາຍໃນຮ່າງກາຍໃຫ້ປົກກະຕິ
- ການດື່ມນ້ຳຫລາຍໆ ຫລື ການດື່ມນ້ຳອຸ່ນມື້ລະບໍ່ຕ່ຳກວ່າ 8 ຈອກແທນການດື່ມກາເຟ ຫລື ນ້ຳອັດລົມ ຊ່ວຍໃຫ້ຮ່າງກາຍອົບອຸ່ນ ຫລຸດອາການໄຂ້ຫວັດໄດ້ ຊ່ວຍໃຫ້ທາງເດີນຫາຍໃຈ ແລະ ທາງເດີນອາຫານຊຸ່ມຊື່ນຂຶ້ນ ເສມຫະ ຖືກຂັບອອກງ່າຍ ແລະຍັງຍັບຢັ້ງການຈະເລີນເຕີບໂຕຂອງໄວຣັສໄດ້ນໍາອີກ ໂດຍເຄື່ອງດື່ມທີ່ນິຍົມດື່ມນັ້ນ ເຊັ່ນ ນ້ຳຂີງ ໂດຍນຳຂີງສັບ 2 ບ່ວງ ກະທຽມສັບ 2-3 ກີບ ແຊ່ໃນນ້ຳຟົດ 5 – 10 ນາທີ ແລ້ວຄົນເປັນຊາດື່ມ ມີສັບຄຸນຊ່ວຍຂັບເຫື່ອ ຊ່ວຍໃຫ້ລະບົບທາງເດີນຫາຍໃຈເຮັດວຽກຄ່ອງຂຶ້ນ ແຖມຍັງຊ່ວຍບັນເທົາອາການເຈັບທ້ອງ ທ້ອງອືດ ແລະ ບັນເທົາອາການຂໍ້ອັກເສບໄດ້ນໍາອີກ
- ແກງໄກ່ຮ້ອນໆຊ່ວຍບັນເທົາອາການ ຄັດດັງ ອາການໄອ ຊ່ວຍກະຕຸ້ນພູມຄຸ້ມກັນ ພ້ອມທັງໃຫ້ໂປຕີນທີ່ດີຕໍ່ຮ່າງກາຍ ເຮັດໃຫ້ຮ່າງກາຍສົດຊື່ນຂຶ້ນ ອາດເຕີ່ມຜັກຫລາຍສີເພີ່ມປະໂຫຍດຈາກສານ ແອນຕິອອກຊິແດນ ເພື່ອໃຫ້ຮ່າງກາຍແຂງແຮງ
- ສານຕໍ່ຕ້ານອານຸມູນອິດສະຫລະເຊັ່ນ ເບຕາແຄໂລທີນ ຫລື ວິຕາມິນເອ ວິຕາມິນຊີ ວິຕາມິນອີ ຊ່ວຍກຳຈັດສິ່ງແປກປອມ ແລະ ເຊື້ອພະຍາດອອກຈາກຮ່າງກາຍ ຫລື ເລືອກກິນຜັກຫມາກໄມ້ທີ່ມີສານຕໍ່ຕ້ານອານຸມູນອິດສະຫລະສູງ ເຊັ່ນ ກາລົດ ຜັກໃບຂຽວ ໝາກສີດາ ໝາກລາແຊັງ ແຄນຕາລູບ ໝາກຫຸ່ງສຸກ ເປັນຕົ້ນ ເຊິ່ງຫາຊື້ໄດ້ງ່າຍ ແລະ ປະຢັດກວ່າການກິນວິຕາມິນຈາກຢາ
- ຫອມຫົວໃຫ່ຍ ແລະ ກະທຽມກະທຽມຊ່ວຍປ້ອງກັນ ແລະ ປິ່ນປົວໄຂ້ຫວັດໄດ້ຢ່າງດີ ໂດຍນຳກະທຽມ 1 ກີບນ້ອຍ ມາຊອຍເປັນບາງໆ ແລ້ວໃຊ້ບ່ວງບີບໃຫ້ແຕກ ເທນ້ຳຮ້ອນລົງໄປ 1 ຖ້ວຍ ປິດຝາຖິ້ມໄວ້ປະມານ 5 ນາທີ ແລ້ວຕື່ມນ້ຳເຜິ້ງ ແລະ
ໝາກນາວລົງໄປ ດື່ມມື້ລະ 2 ຖ້ວຍ ຈະຊ່ວຍຫລຸດອາການຫວັດໃຫ້ເບົາບາງລົງ ຫລືຕຳຫອມບົ່ວໃຫ່ຍໃສ່ຖ້ວຍແລ້ວດົມຊ່ວຍໃຫ້ຫາຍໃຈໂລ່ງຂຶ້ນໄດ້
- ໂຢເກີດຊ່ວຍກະຕຸ້ນການເຮັດວຽກງານຂອງ ເຊລເມັດເລືອດຂາວ ແລະ ເສີມສ້າງສານແອນຕິບໍດີບາງຊະນິດ ໂດຍເລືອກກິນໂຢເກີດທຳມະຊາດຊະນິດໄຂມັນຕ່ຳ ນ້ຳຕານນ້ອຍ ແລະ ມີຈຸລິນຊີທີ່ມີປະໂຫຍດທີ່ມີຊີວິດຢູ່ ຈະໄດ້ຮັບປະໂຫຍດຢ່າງຫລວງຫລາຍ
ນອກຈາກນັ້ນແລ້ວ ຄວນຮັບປະທານອາຫານໃຫ້ຄົບ 5 ໝູ່ ອອກກຳລັງກາຍ ແລະພັກຜ່ອນໃຫ້ພຽງພໍມື້ລະ 8 ຊົ່ວໂມງ ອາກາດໜາວກໍຄວນນຸ່ງເສື້ອຜ້າທີ່ສາມາດກັນໜາວໄດ້ ເພື່ອສ້າງພູມຄຸ້ມກັນ ປ້ອງກັນພະຍາດໄຂ້ຫວັດທີ່ອາດເກີດຂຶ້ນແຕ່ຖ້າຫາກອາການບໍ່ດີຂຶ້ນຄວນພົບແພດເພື່ອການປິ່ນປົວທີ່ຖືກວິທີ