ເຟສບຸກ ສ່ວນໂຕ ແລະ ແຟນເພສ ໃນເຟສບຸກຫຼາຍແຫ່ງໄດ້ມີການແຊສ໌ ຂໍ້ຄວາມທີ່ວ່າ: “ຄົນໄທສາມາດເດີນທາງ ໄປສັກວັກຊີນ ໂຄວິດ-19 ຢູ່ ສປປ ລາວໄດ້”. ຂໍ້ຄວາມດັ່ງກ່າວຖືວ່າ ບໍ່ມີມູນຄວາມຈິງແຕ່ຢ່າງໃດ ເພາະນັກທ່ອງທ່ຽວຕ່າງປະເທດ ຍັງບໍ່ໄດ້ຮັບອະນຸຍາດເດີນທາງເຂົ້າ ສປປ ລາວ ໄດ້.
ກະຊວງສາທາລະນະສຸກຂອງໄທ ໄດ້ ໂພສຂໍ້ຄວາມ ຖະແຫຼງການ ຜ່ານແຟນເພສເພສບຸກ ໃນວັນທີ 4 ພຶດສະພາ 2021 ທີ່ຜ່ານມາວ່າ: ສປປ ລາວ ຍັງຄົງປິດປະເທດ ແລະ ຍັງບໍ່ອະນຸຍາດໃຫ້ນັກທ່ອງທ່ຽວເຂົ້າປະເທດໄດ້ ສ່ວນຄົນຕ່າງຊາດທີ່ສາມາດສັກວັກຊີນໄດ້ ແມ່ນນັກທ່ອງທ່ຽວທີ່ຕົກຄ້າງຢູ່ ສປປ ລາວ, ນັກການທູດ ປະຈຳ ສປປ ລາວ ແລະ ນັກສຶກສາ ຕ່າງປະເທດ ທີ່ຢູ່ ສປປ ລາວ.
ເຊິ່ງໃນໂພສຂ້າງລຸ່ມມີເນື້ອຫາວ່າ: ໃຜກໍຕາມ ທີ່ຢາກໄປສັກວັກຊີນໂຄວິດ-19 ຂອງໄຟເຊີ (Pfizer) ແຕ່ບໍ່ມີງົບເດີນທາງໄປສັກຢູ່ປະເທດໄກໆ ກໍສາມາດ ລອງໄປສັກ ຢູ່ ສປປ ລາວ ໄດ້ ເພາະເຫັນວ່າ ຄົນໄທ ບໍ່ຢາກສັກວັກຊີນຊີໂນແວັກ (Sinovac) ແຕ່ລັດຖະບານໄທ ກໍ່ບໍ່ເອົາວັກຊີນຂອງໄຟເຊີ(Pfizer) ເຂົ້າມາ. ສະນັ້ນ, ເລີຍປະກາດ ເຊີນຊວນ ນັກທ່ອງທ່ຽວ ສາມາດຂໍໄປສັກວັກຊີນໄດ້ຟຣີ ຢູ່ ສປປ ລາວ ເພາະລາວມີ ໄຟເຊີ (Pfizer),ແອສຕາຊີເນກ້າ, (AstraZeneca). ສະປຸກນິກ (Sputnik) ແລະ ຊີໂນຟາມ (Sinophram) ໃຫ້ເລືອກ.
ມີການແຊສ໌ ການອ້າງອີງທີ່ມີເນື້ອຫາແບບດຽວກັນນີ້ ຢູ່ ເຟສບຸກ (Facebook) ແລະ ທະວິດເຕີ້ (Twitter)ເຊິ່ງການອ້າງອີງນີ້ ບໍ່ມີມູນຄວາມຈິງ.